Read Pennsylvania German Shpricha 31 Bible Online

Shpricha 31 - Pennsylvania German bible

Shpricha 31

¹Dess sinn di vadda fumm Lemuel, da kaynich funn Massa— di vadda es sei maemm een gland hott:

²“Oh mei sohn, da sohn funn mei muddahs-leib, da sohn funn mei gebaydah,

³du nett dei graft fasauma uf veibsleit, adda dei macht uf selli es kaynicha fadauva.

⁴Heich moll, Lemuel, kaynicha sedda nett vei drinka, roolahs sedda nett en falanges havva fa shteik drinkes,

⁵adda si mechta drinka un fagessa vass es ksetz sawkt, un si mechta di aylendicha halda funn iahra recht greeya.

⁶Gebb shteik drinkes zu selli es am shtauva sinn, un vei zu selli es in dreebsawl sinn.

⁷Loss si drinka un iahra oahmoot fagessa, un nimmi an iahra aylenda denka.

⁸Shvetz uf fa selli es nett shvetza kenna fa sich selvaht, un fa's recht funn awl selli es falossa sinn.

⁹Shvetz uf un richt mitt gerechtichkeit, un mach es di aylendicha un oahma iahra recht greeya.”

¹⁰Veah kann en goodi fraw finna? Si is may veaht es keshtlichi shtay.

¹¹Iahra mann draut iahra folshtendich; mitt iahra hott eah alles es eah brauch.

¹²Awl iahra layva lang dutt see eem goot, un bringd eem kenn shawda.

¹³See gukt fa vull un flax, un gleicht shaffa mitt iahra hend.

¹⁴See is vi en shiff es kawf-sach drawkt, un bringd iahra ess-sach funn veit ab.

¹⁵See shtayt uf diveil es es noch dunkel is, un risht ess-sach fa iahra haus-halding, un gebt aw zu iahra mawda.

¹⁶See gukt en feld ivvah un kawft's; mitt vass see fadeend, blanst see en vei-goahra.

¹⁷See dutt iahra eahvet mitt graft; iahra eahm sinn shteik.

¹⁸See fahandeld iahra sach un kumd goot raus; iahra licht gayt nett aus nachts.

¹⁹See shpind iahra ayknah naytz, un haybt di shpindel in iahra hend.

²⁰See macht iahra eahm uf zu di oahma, un langd iahra hend naus zu selli in noht.

²¹See hott kenn angsht fa iahra haus-halding vann's shnayt, fa si sinn awl geglayt in voahmi glaydah.

²²See macht sich shayni dekk fa iahra bett; iahra glaydah sinn gmacht aus fei purpel linnen duch.

²³Iahra mann is gekend an di doahra funn di shtatt, vo eah hokt mitt di eldishti fumm land.

²⁴See macht glaydah aus linnen duch un fakawft si; see fakawft belts zu di kawf-leit.

²⁵See is geglayt mitt graft un eah, un see hott kenn angsht veyyich di dawwa es am kumma sinn.

²⁶See shvetzt mitt veisheit, un mitt bamhatzichkeit land see anri leit.

²⁷See vatsht ivvah di sacha funn iahra haus-halding; un see est nett's broht funn faulheit.

²⁸Iahra kinnah shtayn uf un preisa see, un iahra mann lohbt see aw.

²⁹Eah sawkt, “Feel veibsleit sinn goodi veivah, avvah du bisht bessah es si awl.”

³⁰En veibsmensh es sich shay ohshikt, kann em fafiahra, un en shay ksicht bleibt nett fa'immah, avvah en fraw es da HAH fircht, sett gepreist sei.

³¹Gebb iahra di eah es see fadeend hott mitt iahra hend, loss iahra verka gepreist sei an di shtatt-doahra.