Read Pennsylvania German Shpricha 4 Bible Online

Shpricha 4 - Pennsylvania German bible

Shpricha 4

¹Heichet mei kinnah, zu di lanning es en faddah gebt, gevvet acht, so es diah lanning un eisicht greeyet.

²Ich gebb eich goodi lanning, falosset nett sell es ich eich lann.

³Vo ich en boo voah in meim daett sei haus, un voah noch vayyich un's aynsisht kind funn mei maemm,

⁴hott mei daett mich gland un hott ksawt, “Nemm hohld funn mei vadda mitt deim gans hatz; hald mei gebodda un du zaylsht layva.

⁵Grikk veisheit, grikk fashtand, fagess di vadda funn mei maul nett, un dray nett vekk funna.

⁶Faloss di veisheit nett, un see gebt acht uf dich; hald see leeblich, un see vatsht ivvah dich.

⁷Da ohfang funn di veisheit is dess: Grikk veisheit, es macht nix aus vass es dich kosht, grikk eisicht.

⁸Acht di veisheit hohch, un see haybt dich hohch uf, nemm see oh, un see gebt diah grohsi eah.

⁹See dutt gnaydichi blumma uf dei kobb, un gebt diah en glitzahrichah krohn.”

¹⁰So heich mich ab, mei kind, un nemm oh vass ich sawk, no zaylsht du en lang layva havva.

¹¹Ich habb dich gland im vayk funn di veisheit, un habb dich in grawdi pawda kfiaht.

¹²Vann du lawfsht, dann shtayt nix in deim vayk, un vann du shpringsht, zaylsht nett shtolbahra.

¹³Hayb oh zu vass du gland hosht, loss nett gay difunn, du's oahrich heeda, fa's is dei layva.

¹⁴Gay nett uf di pawt funn di gottlohsa, un lawf nett uf em vayk funn evili mensha.

¹⁵Hald dich vekk difunn, un du nett lawfa druff, dray vekk difunn, un gay uf dei vayk.

¹⁶Fa si kenna nett shlohfa biss si evil gedu henn; si sinn fumm shlohf kalda biss si ebbah gmacht henn shtolbahra.

¹⁷Si essa's broht funn ungerechtichkeit, un drinka da vei funn gvald.

¹⁸Da vayk funn di gerechta is vi's licht free meiyets, es sheind hellah un hellah biss es gans dawk is.

¹⁹Avvah da vayk funn di gottlohsa is vi's dunkla, si kenna nett sayna vass si drivvah shtolbahra.

²⁰Mei kind, gebb acht zu vass es ich sawk, heich goot ab zu mei vadda.

²¹Loss si nett vekk kumma funn diah, hald si deef in deim hatz;

²²fa si sinn layva zu selli es si finna, un ksundheit zu iahra gans leib.

²³Ovvich alles shunsht, heet dei hatz, fa dei layves-lawf kumd funn vass im hatz is.

²⁴Loss dei maul nett leeya sawwa, un hald letzi kshvetzah veit vekk funn dei leftz.

²⁵Loss dei awwa grawt fanna naus gukka, hald oh grawt fannich dich vatsha.

²⁶Hald di pawt grawt vo dei fees lawfa, un alles es du dusht drayt recht aus.

²⁷Dray nett rechts adda lings, hald dei foos funn evil nohch gay.