Read Pennsylvania German Shpricha 5 Bible Online

Shpricha 5 - Pennsylvania German bible

Shpricha 5

¹Mei kind, nemm acht funn mei veisheit, un heich ab vass ich dich lann,

²so es du vaysht vi fa dich oh zu shikka, un di vadda funn dei leftz eisicht veisa.

³Di leftz funn en anrah mann sei fraw sinn sees vi hunnich, un iahra kshvetz is gladdah es ayl.

⁴Avvah am end is see biddah vi gall, un bringd shmatza vi en zvay-shneidich shvatt.

⁵Iahra fees gayn nunnah zumm doht, un iahra foos-dredda gayn grawt an's grawb.

⁶See denkt nett an da vayk funn layva, iahra pawda sinn grumm, avvah si vayst's nett.

⁷Nau dann, mei kinnah, heichet mich ab, un drayyet nett vekk funn di vadda es ich sawk.

⁸Hald dich veit vekk funn so en fraw, gay nett nayksht an di deah funn iahra haus,

⁹so es du dei eah nett gebsht zu anri, un dei yoahra zu di unbamhatzicha,

¹⁰un so es fremdi dei graft nett greeya, un vass du kshaft hosht difoah nett gayt zu anri.

¹¹Am end funn deim layva zaylsht du yammahra, vann dei leib un layva fagayn.

¹²Du zaylsht sawwa, “Vi oahrich habb ich kast recht ksetzt sei; mei hatz hott zankes nunnah gedrayt.

¹³Ich habb di shtimm funn mei teetshahs nett abkeicht, un habb mich nett bekimmaht mitt vass si mich lanna henn vella.

¹⁴Mei nohma is shiah goah zu nix kumma fannich di gans fasamling.”

¹⁵Dei fraw is vi en brunna mitt frish vassah, drink vassah funn dei ayknah brunna un sistahn.

¹⁶Sedda dei shpringa ivvah-lawfa in di shtrohsa, un's vassah in da shtatt-shkveah?

¹⁷Dee sacha sinn fa dich laynich, un nett fa anri es fremd sinn.

¹⁸So sei zufridda un ksaykend mitt deim brunna, un froi dich mitt di fraw es du yung keiyaht hosht.

¹⁹Si is leeblich un shay vi en hash, loss iahra leevi dich gans zufridda macha, loss iahra leevi dich fanga un dich hayva.

²⁰Mei kind, favass setsht du uf gnumma sei mitt en aybrechichi fraw? Favass setsht du en anrah mann sei fraw in dei eahm nemma?

²¹Fa yaydah mann sei vayya sinn uf fannich em HAH, un eah vatsht awl sei pawda.

²²Di sinda funn en gottlohsah mann fanga een, un eah vatt kohva mitt di shtrikk funn sei sinda.

²³Eah zayld shteahva veil eah sich nett selvaht meishtahra dutt, un eah faliaht sei vayk deich sei aykni dumhayda.