Read Pennsylvania German Shpricha 6 Bible Online

Shpricha 6 - Pennsylvania German bible

Shpricha 6

¹Mei kind, hosht du fashprocha fa goot shtay fa dei nochbah? Hosht du dei vatt gevva fa ebbah shunsht?

²Voahsht du kfanga bei dei aykni vadda, un bei vass du fashprocha hosht?

³Dann du dess, mei kind, fa dich frei macha, fa du bisht unnich deim nochbah sei hand kumma. Daymeedich dich, gay un hald oh dei nochbah bidda;

⁴Alawb dei awwa nett eishlohfa, un loss dei awwa-dekkel nett zu gay.

⁵Mach dich frei vi en hash fumm hundah sei hand, vi en fokkel aus di hand fumm fangah.

⁶Gay zu di ummensa, du faulah mensh, gukk an iahra vayya, un lann!

⁷Si henn kenn ivvah-saynah, kenn evvahshtah adda roolah.

⁸Avvah doch doon si ess-sach shtoahra im summah, un geddahra iahra ess-sach an di eahn.

⁹Vi lang zaylsht du datt leiya, du faulah mensh? Vann shtaysht du uf fumm shlohf?

¹⁰Yau, noch en vennich shlohfa, noch en vennich leiya bleiva, noch vennich di hend zammah du—

¹¹no kumd di oahmoot uf dich vi en rawvah, un du hosht nix, grawt es vann du grawbt gvest veahsht.

¹²En gottlohsah un nix-nutzichah mensh, gayt rumm un sawkt leeya.

¹³Eah blinkt sei awk, un gebt signs mitt sei fees, eah mohshend mitt sei fingah,

¹⁴diveil es eah am sich rishta is fa evil du mitt falshheit im hatz, un fa shtreit shtroiya.

¹⁵Fasell kumd druvvel uf een, bletzlich unni vanning; uf aymol kumd fadauves uf een es nett kayld sei kann.

¹⁶Es sinn sex sacha es da HAH hast, un sivva es eah nett shtenda kann:

¹⁷Shtolsi awwa, falshi zunga, hend es unshuldich bloot fageesa,

¹⁸en hatz es evili sacha shkeemd, fees es kshvind shpringa fa shawda du,

¹⁹En falshah zeiyah es leekt, un ebbah es druvvel uf shtatt unnich breedah.

²⁰Mei kind, hald deim daett sei gebodda, un gay nett geyyich vass dei maemm dich gland hott.

²¹Binn iahra lanning immah uf dei hatz, henk si um dei hals rumm.

²²Vann du lawfsht, gayn si diah foah, vann du shlohfsht, vatsha si ivvah dich, un vann du uf veksht, shvetza si zu diah.

²³Fa dee gebodda sinn en licht, es ksetz is helling, un di famohninga fa recht do sinn da vayk fumm layva.

²⁴Si halda dich vekk funn en sindlich veibsmensh, funn di glatt zung funn di aybrechich fraw.

²⁵Du nett lushta in deim hatz noch iahra shayheit, un loss see dich nett fanga mitt iahra awwa-dekkel.

²⁶Fa en huah lost ebbah mitt yusht ay layb broht, un en aybrechichi fraw nemd eem sei layva vekk.

²⁷Kann en mann feiyah drawwa in sei shohs, un sei glaydah doon nett fabrenna?

²⁸Kann en mann uf haysi kohla lawfa, unni sei fees fabrenna?

²⁹So is sellah es zu seim nochbah sei fraw gayt, nimmand es si ohraykt zayld unkshtrohft bleiva.

³⁰Leit gukka nett hatt nunnah uf en deeb vann eah hungahrich is un shtayld fa ebbes zu essa.

³¹Doch vann eah kfanga vatt, muss eah sivva mohl so feel zrikk gevva; eah muss alles gevva es eah hott in seim haus.

³²En mann es di ay brecht mitt en fraw, is nett oahrich ksheit; eah dutt sei layva selvaht fadauva.

³³Eah vatt vay gedu un vatt fashand, un sei shand vatt nett ausgrivva.

³⁴Fa en mann es jealous is veyyich sei fraw, vatt oahrich bays, un is nett bamhatzich vann eah zrikk betzawld.

³⁵Eah zayld kenn geld nemma difoah, un zayld nett zufridda sei even mitt feel kshenkah.