Read Pennsylvania German Shpricha 7 Bible Online

Shpricha 7 - Pennsylvania German bible

Shpricha 7

¹Mei kind, meind vass ich diah sawk, un shtoah mei gebodda uf in diah.

²Hald mei gebodda un du zaylsht layva, heet vass ich dich lann es vi da abbel funn deim awk.

³Bind dee gebodda an dei fingah, un shreib si uf's tablet funn deim hatz.

⁴Sawk zu di veisheit, “Du bisht mei shveshtah,” un hays eisicht dei naykshtah freind;

⁵so es si dich vekk halda funn di aybrechich fraw, sell fremd veibsmensh mitt gladdi vadda.

⁶Am fenshtah funn mei haus, habb ich moll deich di rissa naus gegukt.

⁷Ich habb yungi mennah ksenna es noch nett feel fashtayn, un unnich eena voah aynah unni goodi eisichta.

⁸Eah is di shtrohs nunnah ganga nayksht an's ekk funn iahra haus, un hott da vayk zu iahra haus gnumma,

⁹ohvets am dushbah, vi's am dunkel vadda voah.

¹⁰No is di fraw raus kumma een ohdreffa; see voah ohgedu vi en huah, un hott shlichtichi gedanka katt.

¹¹See voah laut un foah-vitzich; iahra fees voahra nee nett dihaym,

¹²dayl zeit in di shtrohs, dayl zeit shunsht rumm, un am voahra an alli ekk.

¹³See hott hohld gnumma an eem un hott'n gekist, un unni shohm hott si ksawt:

¹⁴“Ich habb dank-opfahra macha missa, un heit habb ich mei fashprechnis kalda.

¹⁵So binn ich raus kumma dich ohdreffa; ich habb gegukt fa dich un habb dich kfunna.

¹⁶Ich habb mei bett ivvah-gezowwa mitt kfeahbdi lein-dichah funn Egypta.

¹⁷Ich habb mei bett gmacht goot shmakka mitt myrrhe, aloe un cinnamon.

¹⁸Kumm, vella bei-nannah shlohfa biss meiya-free, vella en goodi zeit havva mitt-nannah.

¹⁹Mei mann is nett dihaym, eah is veit fatt ganga.

²⁰Eah hott en sakk foll geld mitt sich gnumma, un kumd nett haym biss foll moon.”

²¹See hott een fashvetzt mitt iahra shlichtich kshvetz, un hott een nei kshvetzt mitt gladdi vadda.

²²Endlich is eah iahra nohch ganga, so vi en ox gayt fa kshlachta sei; so vi en hash es kfanga is inna fall,

²³biss en arrow deich sei levvah gayt; so vi en fokkel in en net fleekt, un vayst nett es es sei layva nemma zayld.

²⁴Nau dann, mei kinnah, heichet mich ab, nemmet acht funn vass ich sawk.

²⁵Loss dei hatz nett vekk gedrayt sei zu iahra vayya, un lawf nett in iahra pawda.

²⁶See hott feel fashvetzt biss si kfalla sinn, un see is di shuld fa da doht funn en grohsi drubb.

²⁷Iahra haus is da vayk zumm grawb, un's fiaht nunnah zumm doht.