Read Pennsylvania German Shpricha 8 Bible Online

Shpricha 8 - Pennsylvania German bible

Shpricha 8

¹Dutt nett di veisheit naus roofa? Dutt nett di eisicht iahra shtimm sich heahra lossa?

²Ovva uf di hivla am vayk nohch, un an di greitz-vayya dutt see shtay.

³Nayvich di doahra es nei in di shtatt gayn, am eigang funn di doahra, rooft see naus:

⁴“Zu eich, oh mennah, roof ich naus, un greish naus zu alli-ebbah.

⁵Diah es nett bessah visset, fanget oh denka, un diah dummi leit, fanget oh fashtay.

⁶Heichet, fa ich habb nohtvendichi sacha zu sawwa; mei leftz shvetza vass recht is.

⁷Mei maul sawkt di voahheit, un mei leftz hassa vass gottlohs is.

⁸Awl di vadda funn meim maul sinn gerecht, 'sis nix falshes adda abfiahrich in eena.

⁹Si sinn goodi vadda zu alli-ebbah es fashtayt, un sinn gans recht zu selli mitt eisicht.

¹⁰Nemmet mei lanning in blatz funn silvah, un goodi eisicht leevah es fei gold.

¹¹Fa di veisheit is bessah es keshtlichi pearls, un nix es ebbah havva vill is gleicha zu iahra.

¹²Ich, di veisheit, habb eisicht, un ich habb goodah roht zu gevva.

¹³Di furcht fumm HAH maynd du hasht evil; ich hass shtolsheit un hohchmoot, en evil layves-lawf un falshi kshvetzah.

¹⁴Ich habb goodah roht un veisheit; ich habb eisicht un graft.

¹⁵Deich mich doon kaynicha iahra reich ausfiahra, un roolahs doon goodi gebodda macha.

¹⁶Deich mich doon di evvahshta roola, un aw awl di richtah uf di eaht.

¹⁷Ich leeb selli es mich leeva, un selli es mich sucha zayla mich finna.

¹⁸Reichheit un eah sinn bei miah, reichheit es nett shtobt un gerechtichkeit.

¹⁹Mei frucht is bessah es gold, even es fei gold, un vass ich gebb is bessah es es besht silvah.

²⁰Ich lawf uf em vayk funn gerechtichkeit, un uf di pawt funn vass recht is.

²¹Ich gebb reichheit zu selli es mich leeb henn, un fill iahra shtoah-haus mitt keshtlichi sacha.

²²Da HAH hott mich kshaffa am ohfang funn sei eahvet, eb awl sei verka lang zrikk, voah ich do.

²³Ich voah eiksetzt funn ayvichkeit, even am ohfang, eb di eaht voah.

²⁴Ich voah geboahra eb da say, vo's alsnoch kenn shpringa mitt vassah katt hott.

²⁵Eb di berga in iahra blatz ksetzt voahra, un eb di hivla, voah ich geboahra,

²⁶eb Gott di eaht un di feldah gmacht hott, adda even da eahsht shtawb funn di veld.

²⁷Ich voah datt, vo eah di himla in iahra blatz ksetzt hott, un vo eah da himmel ivvah da deef say kshtrekt hott,

²⁸vo eah di volka nuff in di hay ksetzt hott, un vo eah di shpringa fumm say uf gmacht hott.

²⁹Ich voah datt vo eah gebodda gevva hott zumm say, so es di vassahra nett veidah gayn es eah ksawt hott. Ich voah datt vo eah di foundations funn di eaht ausglaykt hott.

³⁰Ich voah nayvich eem vi en shaff-meishtah, un habb een dawk fa dawk froh gmacht. Ich voah immah am mich froiya fannich eem.

³¹Ich habb mich kfroit in sei veld un di mensha-kinnah voahra mei blesiah.

³²Nau dann, mei kinnah, heichet mich ab, ksaykend sinn selli es mei vayya halda.

³³Heichet dee famohning un greeyet veisheit, doond's nett fa'achta.

³⁴Ksaykend is da mann es mich abheicht, es alli dawk vatsht an mei deahra, un es voaht an di poshta funn mei doahra.

³⁵Veah mich find, find layva, un vatt kfellich zumm HAH.

³⁶Avvah veah mich nett find, dutt sich selvaht vay, selli es mich hassa, lohva da doht.”