Read Pennsylvania German Shpricha 9 Bible Online

Shpricha 9 - Pennsylvania German bible

Shpricha 9

¹Di veisheit hott iahra haus gebaut; see hott iahra sivva poshta raus kakt.

²See hott iahra fee kshlachta, iahra vei gmixt, un iahra dish grisht.

³See hott iahra mawda naus kshikt, si rooft funn di haychshta bletz in di shtatt:

⁴“Loss selli es nett oahrich shmeaht sinn do rei kumma!” un zu selli unni goodah fashtand sawkt see:

⁵“Kummet un esset funn meim broht, un drinket funn meim vei es ich grisht habb.

⁶Falosset eiyah dummi vayya un greeyet layva, un lawfet im vayk funn eisicht.

⁷Veah en shpoddah recht setzt, vatt yusht gebyoost difoah, un veah en gottlohsa mensh recht setzt, vatt fafolkt.

⁸Du nett en shpoddah recht setza adda eah hast dich, avvah setz en mann mitt veisheit recht, un eah leebt dich.

⁹Lann en mann mitt veisheit, un eah zayld may veisheit havva, lann en gerechtah mann, un eah macht sich may lanning.

¹⁰Di furcht fumm HAH, is da ohfang funn veisheit, un fa Sellah Heilich lanna kenna, is fashtand.

¹¹Fa deich mich vadda dei dawwa feel, un di yoahra funn deim layva vadda may.

¹²Vann du veisheit hosht, dann is es zu dei ayya goot, avvah vann du shpotsht, dann musht du's selvaht drawwa.”

¹³En fraw mitt dumheit is en laut veibsmensh; si hott kenn veisheit un vayst nix.

¹⁴See hokt an di deah funn iahra haus; see hokt uf en sitz am haychshta blatz in di shtatt,

¹⁵un rooft naus zu selli es fabei gayn, zu selli es grawt on uf iahra vayk gayn.

¹⁶“Loss selli es nett oahrich shmeaht sinn do rei kumma!” Un zu selli unni goodah fashtand sawkt see,

¹⁷“Kshtohla vassah is sees, un ess-sach es gessa is hinna rumm is blesiahlich!”

¹⁸Avvah leit vissa nett es alli-ebbah um kumd es zu iahra gayt, un es selli es see psucha shund im deefa grawb sinn.