Read Pennsylvania German Breddichah 1 Bible Online

Breddichah 1 - Pennsylvania German bible

Breddichah 1

¹Di vadda fumm Breddichah, em Dawfit sei boo, da kaynich in Jerusalem:

²“Nix in layva hott mayning, nix,” sawkt da Breddichah. “Goah nix hott mayning, alles is unni mayning.”

³Vass goot dutt's da mann fa awl di eahvet es eah dutt, alles es eah shaft unnich di sunn?

⁴Ay layves-zeit fagayt, un en anri kumd, avvah di eaht bleibt shtay fa'immah.

⁵Di sunn kumd uf un di sunn gayt unnah, no gayt see kshvind zrikk vo see ufkumd.

⁶Da vind blohst noch di saut un drayt sich un blohst noch di natt; eah gayt rumm un rumm un kumd zrikk vo eah ohkfanga hott.

⁷Awl di revvahra lawfa in da say, avvah da say vatt nett foll. An da blatz vo di revvahra ohfanga, datt gayt's vassah viddah zrikk.

⁸Alli-ebbes macht em falayt un meet, nimmand kann faddich vadda alles sawwa. Es awk kann nee nett faddich vadda alles sayna, un's oah kann nett faddich vadda alles heahra.

⁹Sell vass voah, zayld viddah sei, vass gedu voah, zayld viddah gedu sei; es is nix neiyes unnich di sunn.

¹⁰Hott's ennich ebbes es ebbah sawwa kann, “Gukk moll, do is ebbes neiyes”? Nay, sell voah shund lang do; es voah do lang eb miah do voahra.

¹¹Nimmand denkt an di sacha es eahshtah blatz gnumma henn, un aw nett an di sacha es noch kumma zayla. Si vadda awl fagessa bei selli es nohch kumma.

¹²Ich, da Breddichah, voah kaynich gvest ivvah Israel in Jerusalem.

¹³Un ich habb miah foah-gnumma fa ausfinna un unnah-sucha deich veisheit alles es gedu vatt unnich em himmel. Es is en shveahrah lasht es Gott uf mensha glaykt hott.

¹⁴Ich habb awl di sacha ksenna es gedu sinn unnich di sunn; si sinn awl unni mayning, so vi vann ma broviahra dayt da vind fanga.

¹⁵Vass grumm is, kann nett grawt gmacht sei; vass nett datt is, kann nett gezayld sei.

¹⁶Ich habb ksawt zu miah selvaht, “Gukk moll, ich habb feel gland un may veisheit grikt es awl selli es ivvah Jerusalem voahra eb ich; mei hatz hott grohsi veisheit un eisicht.”

¹⁷Ich habb miah foah-gnumma fa lanna veisheit fashtay, un aw dummi un leahri sacha, avvah ich habb auskfunna es dess aw is vi broviahra da vind fanga.

¹⁸Fa mitt feel veisheit, kumd feel dreebsawl; un deah es feel lanning grikt, muss feel leida.