Read Pennsylvania German Breddichah 10 Bible Online

Breddichah 10 - Pennsylvania German bible

Breddichah 10

¹Vi dohdi mukka goot-shmakkich ayl en faulah kshmakk gevva, so dutt en glay unksheit ding may veeya es veisheit un eah.

²Es hatz fumm mann mitt veisheit gayt rechts, avvah's hatz fumm unksheida gayt lings.

³Even vann eah am vayk nohch lawft, dann fashtayt da unksheit nett feel, un eah veist alli-ebbah vi dumm es eah is.

⁴Vann en roolah bays vatt ivvah dich, bleib vo du bisht; ebbes oahrich letzes kann ivvah-kumma sei bei shtill bleiva.

⁵Es hott en evil es ich ksenna habb unnich di sunn; es is en faylah es roolahs macha.

⁶Samm unksheidi leit vadda in hohchi bletz gedu, diveil es di reicha in niddahri bletz gedu vadda.

⁷Ich habb bunds-gnechta uf di bikkel funn geil ksenna, diveil es di evvahshti am lawfa sinn vi gnechta.

⁸Veah-evvah es en loch grawbt mecht nei falla; veah-evvah es deich en vand brecht mecht gebissa vadda bei en shlang.

⁹Veah-evvah es shtay raus shneit mecht sich vay du dibei, un veah blekk shpald kann sich in di kfoah du.

¹⁰Vann en ax shtumb is un da shneit nett shauf gmacht vatt, dann nemd's may graft avvah mitt veisheit kann's faddich gmacht sei.

¹¹Aynah es kshvetzah drawkt, beist vi en shlang eb see zohm gmacht is beim shlanga-mann.

¹²Di vadda aus em maul fumm mann mitt veisheit macha een ohksenna sei, avvah di vadda fumm unksheida mann bringa een zu nix.

¹³Am ohfang sinn sei vadda yusht dummi kshvetzah, avvah am end sinn si ungettlichah roht.

¹⁴Da unksheit mann hott feel zu sawwa, avvah nimmand vayst vass am kumma is. Nimmand vayst vass es gebt mitt eem shpaydah naus.

¹⁵Em unksheida sei eahvet macht een meet so es eah da vayk nett vayst zu di shtatt.

¹⁶Vay zu diah, oh land, es en kind hott fa en kaynich, un dei evvahshti macha en grohs essa meiyets.

¹⁷Avvah ksaykend bisht du, oh land, vann dei kaynich geboahra voah funn en kaynichi nohch-kummashaft, un dei evvahshti essa an di recht zeit— fa grefta greeya un nett fa ksoffa vadda.

¹⁸Vann en mann zu faul is fa's dach fixa, dann doon di balka sich glei beeya, un deich di faulheit dutt's dach rinna.

¹⁹En grohs essa macht es leit lacha, un vei macht si fraylich, avvah's nemd geld fa alles zvayk bringa.

²⁰Fashimf nett da kaynich, even in dei gedanka, un fafluch nett di reicha in dei bett-shtubb, veil en fokkel funn di luft dei vadda drawwa mecht, un eena sawwa vass du sawksht.