Read Pennsylvania German Breddichah 12 Bible Online

Breddichah 12 - Pennsylvania German bible

Breddichah 12

¹Fagess nett deah es dich kshaffa hott diveil es du noch yung bisht, un eb di evila dawwa kumma un di yoahra nayksht kumma vann du sawksht, “Si kfalla miah nett”—

²eb di sunn un's licht un da moon un di shtanna dunkel vadda, un di volka zrikk kumma noch em reyya;

³an di zeit vann selli ziddahra es es haus vatsha, un shteiki mennah iahra bikkel sich beeya; vann di mawlah shtobba mawla veil's so vennich funna sinn, un selli es am deich di fenshtahra gukka sinn dreeb vadda;

⁴vann di deahra zu di shtrohsa zu gmacht vadda, un di yacht fumm mawles leichtah vatt; vann mennah uf shtayn meiyets an di yacht funn fekkel, avvah di fekkel iahra yacht vatt leichtah;

⁵vann mennah sich feicha in di hay gay, un sich feicha veyyich di kfoah uf em vayk; vann da almond-bohm veisi blumma hott, un da hoi-shrekk sich fassich zeekt, un's is kenn lusht may datt. No gayt da mann an sei ayvichi haymet, un di leit es heila lawfa rumm heah in di shtrohsa.

⁶Denk an deah es dich kshaffa hott— eb da silvah shtrikk fareist, un eb di goldich shissel fabrecht; eb da pitshah fabrecht an di shpring un eb's rawt fabrecht am brunna;

⁷eb da shtawb zrikk drayt zu grund, vo eah bei kumma is un eb da geisht zrikk gayt zu Gott, deah es een gevva hott.

⁸“Awl dess hott kenn mayning,” sawkt da Breddichah. “Nix in layva hott mayning.”

⁹Da Breddichah hott nett yusht veisheit katt, avvah eah hott aw di leit gland un eena eisicht gevva. Eah hott sacha ivvah-gedenkt un ausksucht un feel shpricha ufkokt.

¹⁰Da Breddichah hott ksucht fa di rechta vadda, un vass eah kshrivva hott voah ufrichtich un di voahheit.

¹¹Di vadda funn mennah mitt veisheit sinn vi oxa-gixah, un vi nekkel es hatt nei gedrivva sinn. Si sinn gevva bei ay Shohf-Heedah.

¹²Sei gvand, mei sohn, funn ennich ebbes may vi dee vadda. Es is kenn end zu vi feel bichah es gmacht vadda, un zu feel lannes kann dich ausveahra.

¹³Es end funn awl demm is nau keaht vadda. Un do is vass miah uf kumma mitt: Firchtet Gott un haldet sei gebodda; dess is vass alli mann shuldich is fa du.

¹⁴Fa Gott zayld alli ding richta es miah doon, un sell maynd alli goot adda shlecht ding un aw sell es hinna rumm gedu vatt.