Read Pennsylvania German Breddichah 3 Bible Online

Breddichah 3 - Pennsylvania German bible

Breddichah 3

¹Es is en zeit ksetzt fa alles. Un alles es foah-gnumma vatt unnich em himmel hott sei zeit:

²En zeit fa geboahra sei, un en zeit fa shtauva; en zeit fa blansa, un en zeit fa ausvatzla vass geblanst is.

³En zeit fa doht macha, un en zeit fa hayla; en zeit fa nunnah reisa, un en zeit fa ufbauwa.

⁴En zeit fa heila, un en zeit fa lacha; en zeit fa veina, un en zeit fa dansa.

⁵En zeit fa shtay ausnannah shtroiya, un en zeit fa si zammah samla; en zeit fa ebbah in da oahm nemma, un en zeit fa nett.

⁶En zeit fa sucha, un en zeit fa shtobba; en zeit fa ebbes halda, un en zeit fa's vekk shmeisa.

⁷En zeit fa funn-nannah reisa, un en zeit fa zammah nayya; en zeit fa shtill sei, un en zeit fa shvetza.

⁸En zeit fa leeb havva, un en zeit fa hassa, en zeit fa greek havva, un en zeit fa fridda havva.

⁹Vass grikt da shaff-mann aus sei eahvet?

¹⁰Ich habb di eahvet ksenna es Gott mensha nunnah glawda hott mitt.

¹¹Eah hott alles shaynes gmacht an di recht zeit. Eah hott aw di ayvichkeit in mensha iahra hatza ksetzt, avvah doch kann da mensh nett vissa vass Gott gedu hott fumm ohfang biss an's end.

¹²Ich vays es nix bessah is fa da mensh es fa fraylich sei un goot du diveil es eah laybt;

¹³un es alli-ebbah essa un drinka kann un frayt finna kann in sei eahvet—dess is en kshenk funn Gott.

¹⁴Ich vays es alles es Gott dutt shtay zayld fa'immah; nix kann ditzu gedu vadda un nix vekk gnumma vadda. Gott dutt dess so es mensha een firchta sella.

¹⁵Sell vass is, voah shund lang gvest, un sell vass sei zayld, voah shund lang gvest, un Gott bringd viddah zrikk sell vass faganga is.

¹⁶Un ich habb aw ebbes shunsht ksenna unnich di sunn: Im blatz funn gerichtes, voah ungettlichkeit, un im blatz vo leit iahra recht grikt henn, voah ungerechtichkeit.

¹⁷No habb ich gedenkt in meim hatz, “Gott zayld da gerecht un da ungerecht mann richta, fa alles es foah-gnumma vatt un alli verka henn iahra zeit.”

¹⁸Ich habb aw gedenkt veyyich mensha, “Gott broviaht si so es si sayna kenna es si yusht sinn vi diahra.

¹⁹Es gayt mitt em mensh so vi's gayt mitt di diahra. So vi ayns doht gayt so dutt's anra aw shtauva. Si henn awl zvay da saym ohften. Da mensh hott nix ivvah di diahra, fa's layva hott kenn mayning fa yaydahs funn eena.

²⁰Si gayn aw an da saym blatz; si kumma awl fumm shtawb, un gayn viddah zrikk zu shtawb.

²¹Veah vayst eb da geisht fumm mensh nuff in di hay gayt, un da geisht fumm diah nunnah in di eaht gayt?”

²²So habb ich ausgmacht es es is nix bessah fa da mensh es fa frayt nemma in sei eahvet, fa sell is sei dayl in demm layva. Veah kann een an da blatz bringa es eah sayna kann vass es gevva zayld noch eem?