Read Pennsylvania German Breddichah 6 Bible Online

Breddichah 6 - Pennsylvania German bible

Breddichah 6

¹Es hott noch en evil es ich ksenna habb unnich di sunn un feel leit henn zu du mitt.

²Gott macht en mensh reich un gebt eem feel sach so es eah alles hott es sei hatz havva vill, avvah Gott alawbt een nett's goot greeya difunn. In blatz funn sell grikt en fremdah's goot difunn. Awl dess is leah, gebt layva kenn mayning un is en grohs evil.

³En mann mecht en hunnaht kinnah havva un en lang layva havva, avvah vann sei sayl nett zufridda is mitt di gooda sacha in layva, un eah nett fagrawva vatt vann eah shtaubt, dann sawk ich es en doht-geboahra kind is bessah ab es eah.

⁴So en kind kumd fa nix un gayt on im dunkla. Un aw im dunkla vatt sei nohma fagessa.

⁵Dess kind hott di sunn nee nett ksenna un hott nee nix gvist, avvah's hott may roo es sellah mann,

⁶even vann eah zvay dausend yoah laybt un doch grikt nix goodes aus layva. Gayt nett alli-ebbah an da saym blatz?

⁷Alles es en mensh shaft difoah gayt in sei maul, avvah doch vatt eah nee nett satt.

⁸Vass may hott en mensh mitt veisheit, es aynah unni veisheit? Vass helft's en oahmah mann fa vissa vi sich ohshikka fannich anri?

⁹Vass ma hott un di awwa sayna doon, is bessah es sell es di sayl falanga dutt. Dess is aw leah, unni mayning, un am broviahra da vind fanga.

¹⁰Alles es is, voah shund lang gnohmd, un vass da mensh is, is goot fashtanna. Da mensh kann nett shtreida mitt ebbah es shteikah is es eah selvaht.

¹¹Vi may vadda es ma sawkt, vi vennichah es si mayna, so is ma alsnoch nett bessah ab.

¹²Veah vayst vass goot is fa da mensh in demm layva deich di katza yoahra es nix mayna, un es eah deich gayt vi en shadda? Veah kann eem sawwa vass es gebt unnich di sunn vann eah moll nimmi do is?