Read Pennsylvania German Breddichah 7 Bible Online

Breddichah 7 - Pennsylvania German bible

Breddichah 7

¹En goodah nohma is bessah es goot-shmakkichi shmiah, un da dawk fumm doht is bessah es da dawk es ma geboahra voah.

²Es is bessah fa in en haus gay vo leit am veina sinn, es in en haus vo si am en grohs essa havva sinn, fa alli-ebbah muss shtauva, un di levendicha sedda dess zu hatz nemma.

³Dreebsawl is bessah es lacha, fa dreebsawl is goot fa's hatz.

⁴Es hatz funn sellah mitt veisheit is im haus vo veines is, avvah's hatz fumm dumma is im haus vo blesiah is.

⁵Es is bessah fa da zank ohnemma funn ebbah mitt veisheit, es vi fa abheicha zumm leet funn ebbah es kenn veisheit hott.

⁶Vi di yacht funn danna am brenna unnich en kessel, so is es laches funn di unksheida. Dess is aw unni mayning in demm layva.

⁷En mann mitt veisheit es fashvetzt vatt, faliaht sei veisheit, un en kshenk es gevva vatt hinna rumm, fadeahbt's hatz.

⁸Es end funn ebbes is bessah es da ohfang, un en geduldichah geisht is bessah es en hohchmeedichah.

⁹Loss dich nett kshvind zannich vadda im geisht, fa yusht selli unni veisheit halda da zann.

¹⁰Frohk nett, “Favass voahra di alda dawwa bessah es dee?” Fa du frohksht sell nett mitt veisheit.

¹¹Veisheit, so vi eahbshaft, is en goot ding, un helft selli es di sunn sayna.

¹²Veisheit gebt acht uf dich so vi geld acht gebt uf dich, avvah's goot ding veyyich veisheit is es es layva gebt zu sellah es es hott.

¹³Denk droh vass Gott gedu hott: Veah kann grawt macha vass eah grumm gmacht hott?

¹⁴Vann di zeida goot sinn, seind fraylich, avvah vann si shlecht sinn, denk an dess: Gott hott ayns gmacht grawt vi eah's anra gmacht hott. Fasell, kann da mensh nett vissa vass kumd noch eem.

¹⁵Deich mei layva unni mayning, havvich dee awl zvay ksenna: En gerechtah mann shtaubt in sei gerechtichkeit, un en evilah mann laybt lang in ungettlichkeit.

¹⁶Sei nett zu gerecht in dei aykni awwa, un zayl dich nett mitt zu feel veisheit. Favass vetsht du dich doht macha?

¹⁷Sei nett ivvahrich gottlohs, un loss dich nett unksheit vadda, so es du nett shtaubsht eb dei zeit.

¹⁸Es is goot fa ayns fashtay, un nett gay lossa fumm anra. Sellah es Gott fircht dutt nix ivvah di maws.

¹⁹Veisheit macht en mann es veisheit hott, may greftich es zeyya roolahs in en shtatt.

²⁰Es is kenn gerechtah mann uf di eaht es immah goot dutt un nee nett sindicha dutt.

²¹Nemm nett zu hatz alles es du leit heahsht sawwa, adda du mechsht dei gnecht heahra dich faflucha—

²²fa du vaysht in deim hatz es du en mannich mohl anri faflucht hosht.

²³Ich habb awl dess ausbroviaht mitt veisheit un habb ksawt, “Ich zayl veisheit havva,” avvah's voah veit vekk funn miah.

²⁴Vass-evvah es veisheit is, is oahrich deef un veit ab, veah kann's finna un's fashtay?

²⁵So havvich mei meind uf gmacht fa vissa, fa dess unnah-sucha un veisheit fashtay, un favass es sacha sinn vi si sinn; un aw fa fashtay vi dumm es ungerechtichkeit is, un vi unksheit dumheit is.

²⁶Ich habb dess auskfunna: May biddah es da doht, is es veibsmensh es en hatz hott vi en fall un fang-nets, un hend hott vi kedda. Veah Gott kfellich is kumd vekk funn iahra, avvah da sindah vatt kfanga bei iahra.

²⁷“Nau gukk,” sawkt da Breddichah, “dess is vass ich auskfunna habb: bei ay ding zumm anra du fa sach unnah-sucha,

²⁸mei sayl is alsnoch am sucha un hott's noch nett kfunna. Avvah ich habb ay ufrichtichah mann in en dausend kfunna, un kenn ufrichtich veibsmensh kfunna unnich eena awl.

²⁹Doch habb ich dess kfunna: Gott hott mensha ufrichtich gmacht, avvah si sucha fa iahra ayknah vayk ausshaffa.”