Read Pennsylvania German Breddichah 8 Bible Online

Breddichah 8 - Pennsylvania German bible

Breddichah 8

¹Veah is vi da mensh mitt veisheit? Veah kann sacha auslayya? Veisheit macht en mann sei ksicht fraylich, un macht sei shteif ksicht vayyich.

²Doond vass da kaynich sawkt veil diah Gott fashprocha hend.

³Gaynd nett kshvind vekk fumm kaynich, un shtaynd nett uf geyyich een, fa eah kann ennich ebbes du es eah vill.

⁴Em kaynich sei vatt hott grohsi gvald. Veah kann sawwa zu eem, “Vass bisht du am du?”

⁵Veah-evvah es eem heicht kumd nett in druvvel, un en hatz mitt veisheit vayst vass zu du an di recht zeit.

⁶Es hott en rechti zeit un en rechtah vayk fa alles du es zu du is, even vann em mensh sei druvvel shveah is.

⁷Siddah es nimmand vayst vass es gevva zayld, veah kann eem sawwa vass kumma zayld?

⁸Kenn mensh hott di graft fa da geisht zrikk hayva, un nimmand hott graft ivvah da dawk funn seim doht. Nimmand vatt lohs glost an di zeit funn greek, grawt so, ungettlichkeit drayt selli nett frei es es ausdrawwa.

⁹Ich habb awl dess ksenna un habb ivvah alles gedenkt es gedu vatt unnich di sunn. Es hott zeida vann en mann gvald nemd ivvah en anrah un dutt sich selvaht vay.

¹⁰Un ich habb di gottlohsa ksenna fagrawva vadda; dess sinn selli es als zrikk un faddi fumm heilicha-blatz ganga sinn un henn hohchi eah grikt, grawt in di shtatt vo si iahra gottlohsi sacha ausgedrawwa henn. Dess is aw leah un unni mayning.

¹¹Vann di shtrohf fa en evil ding nett kshvind ausgedrawwa vatt, dann vadda di hatza funn mensha folshtendich ksetzt fa evil du.

¹²Un en ungettlichah mensh mecht en hunnaht mohl letz du un alsnoch en lang layva havva, avvah ich vays es es bessah gay zayld mitt en mensh es Gott fircht, sellah es Gott eaht.

¹³Un veil da ungettlich mensh Gott nett fircht, dann zayld's nett goot gay mitt eem, un sei dawwa zayla nett falengaht vadda vi en shadda.

¹⁴Es is ebbes shunsht es ohgayt uf di eaht es layva kenn mayning gebt. Alsamohl gayt's mitt gerechti mensha es vann si di shlechti verka gedu hedda es di gottlohsa doon, un anri zeida gayt's mitt di gottlohsa es vann si di goodi verka gedu hedda es di gerechta doon. Ich sawk awl dess gebt layva kenn mayning.

¹⁵So glawb ich es da mensh blesiah havva sett in seim layva. Fa's is nix bessah unnich di sunn es fa essa un drinka un fraylich sei. No bleibt dess bei eem in sei eahvet deich awl di dawwa funn seim layva es Gott eem gebt unnich di sunn.

¹⁶Vo ich mei hatz ivvah-gevva habb fa veisheit fashtay un fa alles sayna es gedu vatt uf di eaht, un es leit nett shlohfa kenna dawk un nacht,

¹⁷no habb ich alles ksenna es Gott gedu hott. Un ich habb ausgmacht es nimmand kann alles fashtay es ohgayt unnich di sunn. Es macht nix aus vi hatt es eah sucht difoah, da mensh kann's nett finna. Even vann ebbah mitt veisheit maynd eah vayst's, doch dutt eah's nett fashtay.