Read Pennsylvania German Breddichah 9 Bible Online

Breddichah 9 - Pennsylvania German bible

Breddichah 9

¹So habb ich dess alles ivvah-gedenkt in meim hatz un habb ausgmacht es di gerechta un selli mitt veisheit, un aw vass si doon, is alles in di hend funn Gott. Avvah nimmand vayst eb leevi adda hass am voahra is uf een.

²Es zayld gleicha sei fa alli-ebbah. Es zayld ay end sei fa di gerechta un di gottlohsa, di gooda un di shlechta, selli es rein sinn un selli es nett sinn, un selli es opfahra un selli es nett doon. So vi's is mitt em gooda mann, so is es mitt em sindah; so vi's is mitt demm es shveahra dutt, so is es mitt sellem es sich feicht shveahra.

³Dess is es evil ding in alles es ohgayt unnich di sunn; sell is, es es gleicha end zayld zu alli-ebbah kumma. Un di hatza funn mensha sinn foll evil un unfashtand diveil es si levendich sinn, un shpaydah missa si shtauva.

⁴Ennich ebbah es noch unnich di levendicha is hott hofning. Even en levendichah hund is bessah ab es en dohdah layb!

⁵Fa di levendicha vissa es si shtauva zayla, avvah di dohda vissa nix; si greeya nimmi veidah ennichah lohn, un nimmand denkt may an si.

⁶Iahra leevi un hass un fagunsht sinn shund lang faganga; si zayla kenn dayl may havva mitt ennich ebbes es es gebt unnich di sunn.

⁷So gay un ess dei broht mitt frayt, un drink dei vei mitt en fraylich hatz, fa Gott hayst goot vass du dusht.

⁸Du veisi glaydah oh, un salb dei kobb mitt ayl.

⁹Sei fraylich in demm layva mitt dei fraw es du leeb hosht so lang es du laybsht in demm katz layva es Gott diah gevva hott unnich di sunn. Fa dess is dei dayl im layva un in dei eahvet es du dusht unnich di sunn.

¹⁰Vass-evvah es dei hend finna fa du, du's mitt awl dei macht, fa vo du anna gaysht im grawb zayld kenn eahvet adda denkes adda eisicht adda veisheit sei.

¹¹Ich habb aw dess ksenna unnich di sunn: Selli es shteik shpringa doon nett immah beeda, un di shteika henn nett immah ivvah-hand im greek. Selli mitt veisheit henn nett immah ess-sach; di shmeahda sinn nett immah reich, un di glanda vadda nett immah bessah gyoost. Avvah di recht zeit un glikk dreft alli-ebbah.

¹²Un da mensh vayst aw nett vann sei shtund kumd: Vi fish es unfahoft kfanga vadda in en net, adda fekkel in en fall, so vadda mensha kfanga bei shlechti zeida vann si unfahoft uf si kumma.

¹³Ich habb aw veisheit ksenna unnich di sunn un's hott en deefah meik glost in miah:

¹⁴Es voah moll en glenni shtatt mitt yusht vennich leit drinn. Un en shteikah kaynich is geyyich si kumma, hott di shtatt umringd un hott grohsi grund heifa ufgebaut veddah di vanda.

¹⁵Nau in selli shtatt hott en oahmah mann gvoond mitt feel veisheit. Un eah hott di shtatt kalda funn ivvah-gnumma vadda deich sei veisheit. Avvah noch sellem hott nimmand may an sellah oahm mann gedenkt.

¹⁶So habb ich ksawt, “Veisheit is bessah es graft.” Avvah em oahma mensh sei veisheit vatt niddah gezayld un sei vadda sinn nett abkeicht.

¹⁷Shtilli vadda funn selli mitt veisheit, sedda may keaht sei es di roolahs funn di unksheida iahra laudi vadda.

¹⁸Veisheit is bessah es greeks-ksha avvah ay sindah kann feel shawda du zu sell vass goot is.