Read Pennsylvania German Hohches Leet 1 Bible Online

Hohches Leet 1 - Pennsylvania German bible

Hohches Leet 1

¹Es alli-shensht leet fumm Solomon.

²Eah kist mich mitt di kussa funn seim maul, fa dei leevi is may leeblich es vei.

³Dei salb-ayl shmakt goot; dei nohma is vi goot-shmakkich salb-ayl. Kenn vunnah doon di mayt dich gleicha!

⁴Nemm mich vekk mitt diah—vella kshvind gay! Mei kaynich hott mich in sei shtubb gebrocht. Miah froiya uns un sinn fraylich ivvah dich; miah preisa dei leevi may es vei. Di ufrichticha leeva dich.

⁵Ich binn shvatz, avvah doch leeblich, diah yungi mayt funn Jerusalem, vi di tents funn Kedar, un di tent-curtains fumm Solomon.

⁶Gukket mich nett oh veil ich shvatz binn; di sunn hott mich dunkel gmacht. Mei maemm iahra boova voahra zannich mitt miah, un henn mich gmacht in di vei-goahra shaffa, avvah mei ayknah vei-goahra habb ich fasaumd.

⁷Sawk miah, du es mei sayl leeb hott, vo dusht du dei shohf vayda lossa, un vo dusht du dei shohf roowa lossa ivvah middawk? Favass sett ich rumm gay gukka, bei di drubba funn dei freind?

⁸Vann du dess nett vaysht, du shenshti unnich veibsleit, dann gay di kshpuahra funn di shohf nohch un vayt dei yungi gays nayksht an di tents funn di shohf-heedah.

⁹Ich fagleich dich, mei leeblichi, zu en shayni geils-mah es eikshpand is zu ayns fumm Pharao sei veyya.

¹⁰Dei bakka sinn shay, gedekt mitt keshtlichi kedda, un dei hals mitt shnuahra funn pearls.

¹¹Miah macha diah goldichi oahra-rings eiksetzt mitt silvah.

¹²Diveil es da kaynich an seim dish voah, voah da kshmakk funn mei goot-shmakkich ayl in di luft.

¹³Mei beleebdah is zu miah vi en sekli mitt goot-shmakkich myrrhe es zvishich mei brisht leit.

¹⁴Mei beleebdah is vi goot-shmakkichi blumma es bleeya in di vei-goahra funn Engedi.

¹⁵Du bisht so shay, mei beleebshti! Du bisht so shay! Dei awwa sinn vi dauva awwa.

¹⁶Du bisht so shay, mei beleebdah, un so blesiahlich! Do vo miah leiya is alles gree.

¹⁷Di balka funn unsah haus sinn cedar-baym, un di cypress-baym di ceiling.