Read Pennsylvania German Hohches Leet 3 Bible Online

Hohches Leet 3 - Pennsylvania German bible

Hohches Leet 3

¹Di gans nacht lang uf meim bett habb ich gegukt fa sellah es mei hatz leeb hott; ich habb gegukt fa een avvah habb een nett kfunna.

²Ich zayl uf shtay nau un naus in di shtatt gay; ich zayl deich di grohsa un glenna shtrohsa gay. Ich zayl sucha fa sellah es mei hatz leeb hott. Ich habb gegukt fa een avvah habb een nett kfunna.

³Di vatsh-mennah henn mich kfunna, vi si rumm heah in di shtatt ganga sinn. “Hend diah sellah ksenna es mei hatz leeb hott?”

⁴Grawt noch demm es ich si falossa habb, habb ich sellah kfunna es mei hatz leeb hott. Ich habb een kohva un habb nett gay glost funn eem biss ich een zu mei maemm iahra haus gebrocht habb, an di shtubb es ich geboahra voah drinn.

⁵Diah yungi mayt funn Jerusalem, ich frohk eich, im nohma funn di hash un di vilda diahra im feld, es diah dee leevi nett ufvekket un fahinnahret biss es di leevi kfellich is.

⁶Veah is dess es am ruff kumma is funn di vildahnis es shtawb macht vi shmohk am in di hay gay, mitt goot-shmakkich myrrhe un insens es gmacht is funn di fakawfah iahra shpeis?

⁷Ei gukk moll, 'sis em Solomon sei bett am gedrawwa vadda, un's sinn sechtzich greeks-gnechta dibei, di shteikshta in Israel.

⁸Yaydahs funn eena drawkt en shvatt un si sinn awl goodi fechtah, alli mann hott en shvatt an sei seit henka grisht fa di kfoah funn di nacht.

⁹Da Kaynich Solomon hott sich deah shtool macha glost; deah is gmacht aus cedar-hols funn Lebanon.

¹⁰Di poshta sinn gmacht funn silvah; un da bodda is gmacht funn gold. Da sitz is ivvah-gezowwa mitt purpel duch, un di yunga mayt funn Jerusalem henn's alles shay gmacht inseit.

¹¹Gaynd naus, diah yungi mayt funn Zion un gukket an da Kaynich Solomon mitt seim krohn, da krohn es sei maemm uf een gedu hott uf em dawk funn sei hochtzich, da dawk es sei hatz fraylich voah.