Read Pennsylvania German Hohches Leet 4 Bible Online

Hohches Leet 4 - Pennsylvania German bible

Hohches Leet 4

¹Du bisht so shay, mei beleebdi, so vundahboah shay! Dei awwa sinn vi dauva awwa zvishich dei hoah-zebba. Dei hoah sinn vi en drubb gays am nunnah gay fumm Berg Gilead.

²Dei zay sinn veis vi en drubb kshoahrani shohf es yusht gvesha voahra. Si henn awl zvilling lemmah, kens funna is laynich.

³Dei leftz sinn vi en roht hoah-band; dei maul is shay un leeblich. Dei bakka zvishich dei hoah-zebba sinn vi halvi grannat-ebbel.

⁴Dei hals is vi da tavvah fumm Dawfit es ufglaykt is mitt shtay. En dausend shields henka druff, shields funn shteiki greeks-gnechta.

⁵Dei zvay brisht sinn vi zvay hashlen; vi zvilling hashlen es am feedra sinn uf di lilya-blumma.

⁶Biss es dawk vatt un di shadda fagayn, dann gayn ich an da myrrhe berg, un an da hivvel mitt insens.

⁷Du bisht vundahboah shay, mei beleebdi, un hosht kenn faylah in diah.

⁸Kumm mitt miah funn Lebanon, mei hochtzich-maydel, kumm funn Lebanon mitt miah. Kumm runnah funn drovva uf em Berg Amana, funn drovva uf di Berga Senir un Hermon, runnah funn di layb iahra haymeda un funn di hivla vo di leopards bleiva.

⁹Du hosht mei hatz kshtohla, mei shveshtah, mei hochtzich-maydel; du hosht mei hatz kshtohla mitt ay blikk funn deim awk, mitt ay keshtlichah shtay in dei hals-kett.

¹⁰Dei leevi is so blesiahlich, mei shveshtah, mei hochtzich-maydel! Dei leevi is bessah es vei, un da goot kshmakk funn dei salb-ayl is bessah es seesi shpeis.

¹¹Dei leftz sinn sees vi hunnich, mei hochtzich-maydel, millich un hunnich sinn unnich dei zung. Da goot kshmakk funn dei glaydah is vi da kshmakk funn Lebanon.

¹²Mei shveshtah, mei hochtzich-maydel, du bisht en zu kshlossanah goahra, en kshlossanah goahra, en zu gedekti shpring.

¹³Dei blansa sinn vi en grannat-abbel bamgoahra, mitt shayni frucht, mitt blumma un goot-shmakkichi greidah-ayl

¹⁴mitt greidah-ayl un saffron shpeis, kalamus un cinnamon, un mitt alli sadda insens baym, myrrhe un aloes, un awl di beshta shpeis.

¹⁵Du bisht en goahra shpring, en brunna mitt frish vassah am runnah lawfa funn Lebanon.

¹⁶Vekk uf, vind funn di natt, un kumm, vind funn di saut! Blohset uf mei goahra, so es da kshmakk funn di shpeis rumm blohst. Loss mei beleebdah in sei goahra kumma, un's besht frucht essa.