Read Pennsylvania German Hohches Leet 5 Bible Online

Hohches Leet 5 - Pennsylvania German bible

Hohches Leet 5

¹Ich binn in mei goahra kumma, mei shveshtah, mei hochtzich-maydel; ich habb myrrhe un shpeis zammah ksammeld. Ich habb mei hunnich-rohsa un mei hunnich gessa, un habb mei vei un millich gedrunka. Esset, diah es unsah freind sind; drinket biss diah foll sind, diah es nannah leeb hend.

²Ich habb kshlohfa avvah mei hatz voah vakkah. Heich moll! Mei beleebdah is am ohglobba: Mach uf, mei shveshtah, mei beleebdi, mei daub unni faylah in sich. Mei kobb is nass fumm dau un mei hoah funn di feicht funn di nacht.

³Ich habb mei glaydah shund ausgedu, favass sett ich si viddah ohdu? Ich habb mei fees shund gvesha, favass sett ich si viddah drekkich macha?

⁴Mei beleebdah hott sei hand rei kshtekt deich's deah loch; mei hatz hott ohkfanga globba fa een.

⁵Ich binn ufkshtanna fa uf macha fa mei beleebdah, mei hend henn gedrobst mitt myrrhe, mei fingah voahra nass mitt myrrhe, vi ich di deah uf gmacht habb.

⁶Ich habb uf gmacht fa mei beleebdah, avvah mei beleebdah voah nimmi datt. Mei hatz voah bedreebt vo eah kshvetzt katt hott. Ich habb ksucht fa een avvah habb een nett kfunna. Ich habb een groofa avvah eah hott kenn andvat gevva.

⁷Di vatsh-mennah henn mich kfunna vi si rumm heah ganga sinn in di shtatt. Si henn mich kshlauwa un vay gedu; di vatsh-mennah uf di vand henn mei shawl vekk gnumma!

⁸Oh yungi mayt funn Jerusalem, ich frohk eich, vann diah mei beleebdah finnet, sawwet eem es ich matt binn mitt leevi fa een.

⁹Vi is dei beleebdah bessah es anri, du shenshti unnich veibsleit? Vi is dei beleebdah bessah es anri, es du dess frohksht funn uns?

¹⁰Mei beleebdah is shay un shteik, eah shtayt raus unnich zeyya dausend.

¹¹Sei kobb is vi fei gold; sei hoah is mitt curls un so shvatz es en grabb.

¹²Sei awwa sinn vi dauva es bei em vassah sinn. Si sinn gvesha in millich un eiksetzt vi en keshtlichah shtay.

¹³Sei bakka sinn vi blumma-goahra mitt balsam es goodah kshmakk ab gay lost. Sei leftz sinn vi lilya-blumma es nass sinn mitt myrrhe.

¹⁴Sei eahm sinn vi rooda funn gold es eiksetzt sinn mitt keshtlichi shtay. Sei leib is vi sheinich ivory, es eiksetzt is mitt sapphire-shtay.

¹⁵Sei bay sinn vi poshta funn marbel es uf kohva sinn mitt goldichi fees. Eah gukt shteik un shay vi di cedars funn Lebanon.

¹⁶Sei maul is sees un alles an eem is leeblich. Dess is mei beleebdah, mei freind, diah yungi mayt funn Jerusalem.