Read Pennsylvania German Hohches Leet 7 Bible Online

Hohches Leet 7 - Pennsylvania German bible

Hohches Leet 7

¹Vi shay sinn dei fees mitt shoo oh, du dochtah funn en kaynich! Dei rundi hifta sinn vi keshtlichi shtay, es gmacht sinn bei en shaff-meishtah.

²Dei navvel is vi en vei-glaws, es immah goodah vei drinn hott. Dei bauch is vi en haufa vaytza, es lilya-blumma drumm rumm hott.

³Dei zvay brisht sinn vi zvilling hashlen.

⁴Dei hals is vi en rundah tavvah gmacht funn ivory. Dei awwa sinn vi di vassah-lechah funn Hesbon am Bathrabbim doah. Dei naws is vi da rund tavvah funn Lebanon es geyyich Damascus gukt.

⁵Dei kobb uf diah is vi da Berg Karmel. Dei sheinichi hoah henka nunnah, un sinn so shay es es en kaynich fanga dayt.

⁶Du bisht so shay un so leeblich, mei leeblichi, mitt dei blesiah!

⁷Du shtaysht grawt uf vi en palma-bohm; dei brisht sinn vi en hengel drauva.

⁸Ich habb ksawt, “Ich zayl nuff gradla uf da palma-bohm, un zayl hohld nemma funn sei nesht.” Loss dei brisht sei vi drauva am vei-shtokk, da kshmakk funn deim ohften vi ebbel

⁹un di kussa funn dei maul vi da besht vei. es blesiahlich nunnah gayt ivvah di leftz un zay.

¹⁰Ich heah zu meim beleebdah, un sei falanga is fa mich.

¹¹Kumm, mei beleebdah, vella naus in di feldah gay, un ivvah-nacht in di shtedlen bleiva.

¹²Vella free meiyets naus an di vei-goahra gay, fa sayna eb di vei-shtekk gebleet henn. Vann iahra blumma uf sinn, un di grannat-ebbel am bleeya sinn— datt gebb ich diah mei leevi.

¹³Di leeb-ebbel blumma shikka iahra goodah kshmakk naus, un alli sadda goodi frucht is um uns rumm. Fa dich habb ich awl dee alda un neiyi blesiahra ufkshtoaht, mei beleebdah.