Read Pennsylvania German Hohches Leet 8 Bible Online

Hohches Leet 8 - Pennsylvania German bible

Hohches Leet 8

¹Oh, vann du yusht veahsht vi en broodah, es an mei maemm iahra brisht ksukkeld hott! No vann ich dich draus ohdreffa dayt, kend ich dich kissa, un nimmand dayt ebbes denka difunn.

²Ich dayt dich no fiahra, un dayt dich zu mei maemm iahra haus bringa— selli es mich gland hott. Ich dayt diah kshpeisdah vei gevva zu drinka, da seidah funn mei grannat-ebbel.

³Sei lingsah oahm is unnich meim kobb, un sei rechtsah oahm is um mich rumm.

⁴Diah yungi mayt funn Jerusalem, ich frohk eich es diah di leevi nett ufvekket un fahinnahret, biss es di leevi kfellich is.

⁵Veah is dess am ruff kumma funn di vildahnis, un lost sich uf da oahm funn iahra beleebdah? Unnich em abbel-bohm habb ich dich uf gvekt, datt voahsht du ohkfanga in dei maemm, datt in shmatza hott see dich geboahra.

⁶Du mich uf dei hatz vi en seal, vi en seal uf dei oahm. Fa di leevi is so shteik es da doht, un is jealous un shtreng so vi's grawb. Es brend vi en hays feiyah, un vi en mechtich flamm.

⁷Feel vassah kann di leevi nett ausmacha, revvahra kenna di leevi nett vekk vesha. Vann ebbah awl's keshtlich sach in seim haus gevva vett fa leevi, dann veah's alles gans nunnah gedrayt.

⁸Miah henn en yungi shveshtah; iahra brisht sinn noch nett gvaxa. Vass sella miah du fa unsah shveshtah, vann ebbah frohkt fa see heiyahra?

⁹Vann see en vand is, dann bauwa miah en silvah tavvah uf see. Vann see en doah is, dann macha miah see zu mitt cedar blanka.

¹⁰Ich binn en vand, un mei brisht sinn vi rundi tavvahs. So binn ich vadda zu eem vi ebbah es eem fridda gebt.

¹¹Da Solomon hott en vei-goahra katt an Baal-Hamon; eah hott sei vei-goahra naus glaynd. Yaydah ebbah hott en dausend shtikkah silvah gebrocht fa's frucht.

¹²Mei ayknah vei-goahra heaht zu miah; ich gebb en dausend shtikkah silvah zu diah, Solomon, un zvay hunnaht zu selli es acht gevva uf's frucht.

¹³Du es in di goahra hoksht, mei freind sinn am voahra fa dei shtimm, loss mich dei shtimm aw heahra.

¹⁴Kumm kshvind, mei beleebdah, sei vi da hash adda vi en yungah hasha-bokk es drovva in di berga is vo shpeis vaxa.