Read Pennsylvania German Jesoiya 12 Bible Online

Jesoiya 12 - Pennsylvania German bible

Jesoiya 12

¹Uf sellah dawk zaylsht du sawwa: “Ich gebb dank zu diah, oh HAH. Fa du voahsht zannich mitt miah, avvah dei zann is nau vekk gedrayt, un du dusht mich drayshta.

²Gott is geviss mei saylichkeit; ich drau eem un zayl mich nett feicha. Gott da HAH is mei Graft un mei Psaltah-Leet; eah is mei saylichkeit vadda.”

³Mitt frayt zaylet diah vassah ruff zeeya aus di brunna funn saylichkeit.

⁴In sellah dawk zaylet diah sawwa, “Gevvet dank zumm HAH; roofet sei nohma oh; losset's vissa gmacht unnich di heida vass eah gedu hott, un sawwet eena vi grohs es eah is.

⁵Singet zumm HAH, veil eah hallichi sacha gedu hott; machet dess vissa glost ivvah di gans eaht.

⁶Greishet laut un singet mitt frayt, diah leit funn Zion, fa grohs unnich eich is sellah Heilichah funn Israel.”