Read Pennsylvania German Jesoiya 13 Bible Online

Jesoiya 13 - Pennsylvania German bible

Jesoiya 13

¹Dess is da zeiya veyyich Babylon es da Jesoiya, em Amos sei boo, ksenna hott:

²Uf en hohchah hivvel hayb en flag uf, roof laut zu eena; hayb dei hand uf un veis eena da vayk, so es si deich di doahra funn di feddahshta rei kumma.

³Ich habb gebodda gevva zu mei heilichi. Ich habb mei mechtichi greeks-gnechta bei groofa, selli shtolsa funn meina, fa mei zann ausdrawwa.

⁴Heichet zu di yacht uf di berga, vi en yacht funn feel leit! Heichet zu di ufruah unnich di kaynich-reicha, es vi vann di heida am zammah kumma veahra. Da Awlmechtich HAH is am greeks-gnechta zammah greeya fa greek macha.

⁵Si kumma funn lendah funn veit vekk, fumm end funn di himla, da HAH un di greeks-ksharra funn sei zann, fa's gans land fadeahva.

⁶Veinet, fa da dawk fumm HAH is nayksht, es zayld kumma vi en fadeahvung fumm Awlmechticha.

⁷Fasell vadda alli hend shvach, alli-ebbah sei hatz zayld shmelsa.

⁸Si vadda fagelshtaht, shmatza un angsht kumma ivvah si; es vatt eena bang vi en fraw am en kind havva. Si gukka an nannah mitt furcht, iahra ksichtah sinn roht vi flamm.

⁹Gukket, da dawk fumm HAH zayld kumma, en veeshtah dawk mitt gleedichah zann, dess macht's land blutt, un di sindah im land kumma um.

¹⁰Awl di shtanna im himmel zayla iahra helling nett gevva. Di sunn es am uf kumma is vatt dunkel, un da moon zayld sei licht nett gevva.

¹¹Ich zayl di veld shtrohfa fa iahra evil, un di gottlohsa fa iahra sinda. Ich zayl en end macha funn di hohchmeedicha un shtolsa, un zayl selli daymeedicha es frech un unfashtendlich sinn.

¹²Ich loss so vennich mensha ivvahrich, es si vennichah sinn es fei gold, vennichah es es gold funn Ophir.

¹³No mach ich di himla ziddahra; un di eaht zayld aus iahra blatz shidla deich da zann fumm Awlmechticha HAH, im dawk funn sei haysah zann.

¹⁴Vi en hash es di hundah am hunda sinn, adda vi en shohf es kenn heedah hott, zayld alli-ebbah zrikk drayya zu sei aykni leit, un alli-ebbah zayld zrikk gay zu sei ayya land.

¹⁵Alli-ebbah es kfunna vatt, vatt deich kshtohsa, un selli es kfanga vadda, zayla falla bei em shvatt.

¹⁶Iahra glenni kinnah zayla fasmaesht vadda fannich iahra awwa. Iahra heisah vadda grawbt, un iahra veivah fashand.

¹⁷Nau gukket, ich zayl di leit funn Media ufshtadda geyyich si, dee es sich nett abgevva mitt silvah, un es nett ufgnumma sinn mitt gold.

¹⁸Iahra bows zayla di yunga mennah nunnah sheesa; si zayla nett bamhatzich sei zu's frucht fumm leib, un si zayla di kinnah nett davvahra.

¹⁹Un Babylon, es shenshta in di kaynich-reicha, di hallichkeit funn di shtolsa Chaldayah, zayld ivvah-kshmissa sei bei Gott, so vi Sodom un Gomorra voahra.

²⁰Nimmand zayld may drinn voona, adda ennich ebbah may drinn sei fa'immah un immah; di Arabs zayla iahra tents nett uf du datt, un di shohf-heedah lossa iahra shohf nett anna leiya datt.

²¹Avvah di vilda diahra zayla datt leiya; di heisah zayla foll owls sei. Di ostriches zayla datt voona, un di vilda gays datt rumm dansa.

²²Di vilda hund zayla yohla in di tavvahs, un foxa in di kaynich-heisah. Babylon iahra zeit is kumma, iahra dawwa zayla nimmi lang sei.