Read Pennsylvania German Jesoiya 15 Bible Online

Jesoiya 15 - Pennsylvania German bible

Jesoiya 15

¹En zeiya veyyich Moab: In ay nacht is di shtatt Ar in Moab zu nix gebrocht, un in ay nacht is di shtatt Kir in Moab aw fadauva.

²Di leit funn Dibon gayn nuff an da tempel, si gayn in di hohcha-bletz fa heila, Moab heild ivvah Nebo un Medeba, alli-ebbah hott sei kobb kshoahra, un sei boaht abkshnidda.

³Si veahra sekk-glaydah in di shtrohsa, uf di dechah un in di shtrohsa sinn si am heila, alli-ebbah is am brilla.

⁴Hesbon un Eleale sinn am heila; iahra shtimma vadda keaht gans drivva an Jahza. Fasell doon di greeks-leit funn Moab laut heila; iahra moot is gans faloahra.

⁵Mei hatz heild ivvah Moab, di leit henn sich vekk gebutzt biss an Zoar, so veit biss an Eglath-Shelishiya. Si gayn nuff uf em vayk zu Luhith am heila, uf em vayk noch Horonaim heila si laut ivvah alles es fadauva is.

⁶Di vassahra funn Nimrim sinn ufgedrikkeld; es graws is favelkt, un alles is drukka. 'Sis nix greenes ivvahrich.

⁷Es feel sach es si grikt henn un sell es si ufkshtoaht henn, drawwa si ivvah di Grikk funn Veida-Baym.

⁸Di yacht fumm heiles gayt ivvah's gans land Moab; iahra gebrill vatt keaht so veit es Eglaim, un iahra yammahres biss an Beer-Elim.

⁹Di vassahra funn Dimon sinn foll bloot, avvah ich bring noch may uf Dimon. Ich shikk en layb uf selli es raus gayn, un aw uf selli es ivvahrich sinn im land.