Read Pennsylvania German Jesoiya 16 Bible Online

Jesoiya 16 - Pennsylvania German bible

Jesoiya 16

¹Di leit funn Moab shikka lemmah zu di roolahs fumm land. Funn di shtatt Sela shikka si si deich di vildahnis, zu Jerusalem drovva uf em berg.

²Vi glenni fekkel ausnannah gayn es aus em nesht kshohva sinn, so sinn di veibsleit funn Moab am zrikk un faddi gay, am blatz vo ma ivvah da Arnon Revvah gayt.

³Si sawwa zu Juda, “Gevvet uns roht, machet aus vass zu du. Machet eiyah dunklah shadda ivvah uns sei, so vi nacht in di mitt fumm dawk. Fashteklet di fayawkta, un losset nimmand si finna.

⁴Losset di auskshtohsana funn Moab bei eich bleiva, fashteklet si funn demm es fadaubt.” Da fafolyah zayld shtobba; dess fafolyes kumd zu en end, un zayld aus em land gay.

⁵No vatt en kaynich-shtool ufkokt in shtandhaftichi-leevi. En richtah zayld druff hokka in voahheit, aynah fumm Dawfit sei haus. Eah zayld recht richta, un di gerechtichkeit kshvind ausfiahra.

⁶Jerusalem sawkt, “Miah henn keaht funn Moab iahra shtolsheit, iahra hohchmoot un shtolsheit. Si sinn shtols, moot-villich un zannich, avvah iahra gebraekk maynd nix.

⁷Fasell doon di Moabiddah heila, si heila fa Moab. Si yammahra un heila fa di reseina-kucha funn di shtatt Kir-Hareseth. Si sinn gans unni moot.

⁸Di feldah funn Hesbon sinn favelkt, un so sinn di drauva-shtekk funn Sibma. Di roolahs funn di heida henn di beshta drauva-shtekk nunnah kshtambt, dee es naus ganga sinn biss an Jaser, un naus gvaxa sinn biss an di vildahnis. Iahra ranka sinn ausnannah ganga biss an da say.

⁹Ich heil mitt di shtatt Jaser ivvah di vei-shtekk funn Sibma, mei awwa-vassah fald uf Hesbon un Eleale, fa di yacht funn greek is ivvah dei frucht un eahn kumma.

¹⁰Di frayt funn di eahn is vekk gnumma funn di fruchtboahra feldah; nimmand singd mitt frayt in di vei-goahra, un nimmand drett da vei raus in di vei-pressa. Ich habb's singes kshtobt.

¹¹Fasell heild mei hatz ivvah Moab vi en harf, mei innahlich leib dutt vay fa Kir-Heres.

¹²So vann di leit funn Moab an di hohcha awldah gayn dann veahra si sich yusht aus. Vann si an da awldah gayn fa bayda, dann richta si nix aus.”

¹³Dess is es vatt es da HAH shund ksawt hott veyyich Moab.

¹⁴Avvah nau sawkt da HAH, “In drei yoah's zeit, so vi en gnecht di zeit zayla dayt, dann zayld di hallichkeit funn Moab un iahra leit abkshnidda sei. Yusht vennich funn iahra leit zayla ivvahrich sei un si zayla oahrich shvach sei.”