Read Pennsylvania German Jesoiya 18 Bible Online

Jesoiya 18 - Pennsylvania German bible

Jesoiya 18

¹Vay zumm land es ma di yacht funn flikkel heaht, es land ivvah di revvahra funn Ethiopia,

²dess land es botshafta shikt bei say, mitt shiffah gmacht funn vassah-shtengel. Gaynd, diah kshvindi botshaftah, zu en leit es lang sinn mitt gladdi haut, zu en leit es furcht bringd zu anri leit ivvahrawl, en shreklich un en shteik folk, es en land hott, fadayld mitt revvahra.

³Awl diah leit funn di veld, diah es uf di eaht voonet, vann en sign uf gedu vatt uf di berga, dann saynet diah si. Vann en blohs-hann blohst, dann heahret diah's.

⁴Da HAH hott dess ksawt zu miah, “Ich zayl mich shtill hayva un nunnah gukka funn mei blatz, so vi helli hitz funn di sunn, un vi da dau nuff gayt in di hitz funn di eahn.”

⁵Eb di eahn, vann di blumma moll faddich sinn, un di blumma vadda drauva am zeidich vadda, no shneit eah di neiya ranka zrikk mitt messahra, un shneit di grohsa nesht ab un nemd si vekk.

⁶Si vadda awl leiya glost fa di awdlah un di vilda diahra; di fekkel feedra uf si im summah, un di vildi diahra im vindah.

⁷An selli zeit vadda kshenkah gebrocht zumm Awlmechticha HAH, funn en leit es lang sinn mitt gladdi haut, un es furcht bringa zu anri leit ivvahrawl, en shreklich un shteik folk, es en land hott, fadayld mitt revvahra. Di kshenkah vadda gebrocht uf da Berg Zion, da blatz fumm Awlmechticha HAH sei Nohma.