Read Pennsylvania German Jesoiya 2 Bible Online

Jesoiya 2 - Pennsylvania German bible

Jesoiya 2

¹Dess is es vatt es da Jesoiya em Amoz sei boo ksenna hott veyyich Juda un Jerusalem:

²Es zayld zu kumma in di letshta dawwa, es da berg vo da tempel fumm HAH druff shtayt, da feddahsht sei zayld unnich awl di berga; eah zayld uf kohva sei ovvich awl di hivla, un awl di heida zayla datt anna lawfa.

³Feel leit zayla kumma un sawwa, “Kummet, vella nuff uf da berg fumm HAH gay, an's haus fumm Gott fumm Jakob. Eah zayld uns sei vayya lanna, so es miah in sei pawda lawfa kenna.” Es ksetz zayld naus gay funn Zion, un em HAH sei vatt funn Jerusalem.

⁴Eah zayld richta unnich di heida, un zayld feel leit iahra shtreit unnich nannah recht setza fa si. Si zayla iahra shvadda in blooks-peinda macha un iahra shpiahra in sichla. Kenn folk zayld's shvatt uf nemma geyyich en annah folk, un si zayla nee nimmi lanna fa greek macha.

⁵Kummet nau, diah haus fumm Jakob, vella lawfa im licht fumm HAH.

⁶Du hosht dei leit, nohch-kummashaft fumm Jakob falossa. Si sinn foll mitt hexahrei funn di east, si dreiva zaubahrei vi di Philishtah, un si macha sich gans aynich mitt fremdi iahra vayya.

⁷Iahra land is kfild mitt silvah un gold, un's is kenn end zu iahra keshtlich sach. Iahra land is foll mitt geil, un's is kenn end zu iahra greeks-veyya.

⁸Iahra land is kfild mitt abgott-gleichnisa; si gneeya nunnah zu sach es iahra hend gmacht henn, sell es iahra fingah kshaft henn.

⁹So da mensh zayld niddah gebohwa sei, un da hohch-gacht mann gedaymeedicht, avvah du si nett fagevva.

¹⁰Gaynd in di felsa-lechah, fashteklet eich im grund aus angsht fumm HAH, un funn sei macht un hallichkeit.

¹¹Di hohcha awwa fumm mann vadda gedaymeedicht, un di shtolsa mennah vadda niddah gebrocht; Da HAH laynich zayld hohch ufkohva sei in sellah dawk.

¹²Da Awlmechtich HAH zayld en dawk havva, vo eah geyyich awl di hohcha un shtolsa is, geyyich alli-ebbah es sich ufblohst. Si zayla niddah gebrocht vadda.

¹³Eah zayld geyyich di hohcha cedar-baym in Lebanon sei, geyyich awl di aycha-baym in Basan,

¹⁴geyyich awl di hohcha berga, un awl di hivla es sich uf hayva,

¹⁵geyyich alli hohchah tavvah, un geyyich alli fashteikti mavvah,

¹⁶geyyich awl di shiffah im say un awl di shayna boats.

¹⁷Da hohchmoot fumm mensh vatt niddah gebrocht, un di shtolsheit funn mennah vatt gedaymeedicht. Da HAH laynich zayld hohch ufkohva sei in sellah dawk,

¹⁸un di abgettah vadda nimmi ksenna.

¹⁹Mensha zayla in di felsa-lechah gay, un zayla sich fashtekla in lechah im grund aus angsht fumm HAH, un di furcht funn sei macht un hallichkeit, vann eah moll uf shtayt un di eaht shiddeld.

²⁰Im sellem dawk zayla mennah iahra silvahrichi un goldichi abgettah vekk shmeisa zu di mohls un fleddah-meis, dee sacha es si gmacht henn fa ohbayda.

²¹Si zayla in di felsa-lechah shpringa, un in di rissa an di shtay vanda nohch aus angsht fumm HAH, un di furcht funn sei macht un hallichkeit, vann eah moll uf shtayt un di eaht shiddeld.

²²So heahret uf eiyah fadrauwa in da mensh du, deah es yusht en ohften in di naws is. Vass is eah veaht?