Read Pennsylvania German Jesoiya 20 Bible Online

Jesoiya 20 - Pennsylvania German bible

Jesoiya 20

¹Im yoah es da greeks foah-gengah zu Asdod kumma is, vo da Sargon, da kaynich funn Assyria een kshikt katt hott, un eah di shtatt Asdod kfochta hott un si ivvah-gnumma hott—

²an selli zeit hott da HAH kshvetzt deich da Jesoiya, em Amoz sei boo. Eah hott ksawt zu eem, “Nemm di sekk-glaydah ab funn dei hiftza un di shoo funn dei fees.” Eah hott sell gedu un is nakkich un boah-feesich rumm ganga.

³No hott da HAH ksawt, “Grawt vi mei gnecht da Jesoiya nakkich un boah-feesich drei yoah rumm ganga is fa en zaycha un en veisung geyyich Egypta un Kush,

⁴so zayld da kaynich funn Assyria di kfangana funn Egypta un di fadrivvana funn Kush fatt fiahra. Yung un ald gleicha, zayla nakkich un boah-feesich rumm heah gay unni di shandlicha bletz fumm leib zu gedekt havva. Dess zayld en shohm sei fa Egypta.

⁵Selli es iahra fadrauwa in Kush un Egypta gedu henn zayla sich no feicha un shemma.

⁶Di leit es am say nohch voona zayla sellah dawk sawwa, ‘Saynet vass es gevva hott mitt selli es miah uns falossa henn druff, selli es miah ditzu ganga sinn fa hilf un uns frei macha fumm kaynich funn Assyria! Vi kenna miah lohs gmacht vadda?’”