Read Pennsylvania German Jesoiya 22 Bible Online

Jesoiya 22 - Pennsylvania German bible

Jesoiya 22

¹En zeiya veyyich di Valley funn Vision: Vass baddaht eich nau, es diah nuff uf di haus-dechah ganga sind,

²diah in di shtatt es yachtich is, diah in di shtatt es fraylich un yachtich is? Eiyah dohdi voahra nett doht gmacht mitt em shvatt, un aw nett uf em greeks-feld.

³Awl eiyah foah-gengah sinn mitt-nannah difunn kshprunga, si voahra fesht gnumma unni iahra bow sheesa. Awl diah es kfanga voahret, voahra mitt-nannah fesht gnumma, even vann diah veit vekk kshprunga sind.

⁴Fasell habb ich ksawt, “Dray vekk funn miah, loss mich biddahlich heila. Broviah nett mich drayshta, veyyich mei leit es doht gmacht voahra.”

⁵Fa da Hah, da Awlmechtich HAH hott en dawk mitt fagelshtahres, nunnah-dreddes, un fashtatzes in di Valley funn Vision, en dawk es di vanda nunnah gebrocha vadda, un leit roofa naus zu di berga.

⁶Di greeks-gnechta funn Elam sinn kumma mitt iahra arrow-sekk, mitt greeks-veyya un geil, un selli funn Kir henn iahra shields abgedekt.

⁷Eiyah shenshti valleys sinn foll greeks-veyya, un mennah uf geil shtayn an di shtatt-doahra.

⁸Juda is gans abgedekt un kann sich nett selvaht helfa. An selli zeit hend diah eich falossa uf's greeks-ksha im Haus im Bush.

⁹Diah hend ksenna es di vanda funn di shtatt fumm Dawfit feel lechah drinn henn. Diah hend vassah ufkshtoaht im unnahshta vassah-loch.

¹⁰No hend diah di heisah in Jerusalem gezayld, un hend heisah nunnah grissa fa di vanda ufbauwa.

¹¹Diah hend en vassah-loch gmacht zvishich di zvay vanda, fa's vassah aus em alda vassah-loch shtoahra. Avvah diah hend eich nett falossa uf sellah es es gmacht hott, un hend sellah nett gacht es es auskshaft hott lang zrikk.

¹²Fasell hott da Hah, da Awlmechtich HAH, zu eich groofa an sellah dawk, fa heila un veina, fa eiyah hoah abshneida un sekk-glaydah veahra.

¹³Avvah in blatz funn sell sind diah fraylich un am en goodi zeit havva, diah sind am kee un shohf shlachta, am flaysh essa un vei drinka. Diah sawwet, “Vella essa un drinka, fa meiya mechta miah shtauva!”

¹⁴Da Awlmechtich HAH hott dess gvissa zu miah: “Dee do sind zayld nett fagevva sei so lang es si layva!” So sawkt da Hah, da Awlmechtich HAH.

¹⁵Dess is vass da Hah, da Awlmechtich HAH sawkt: “Gay zu demm ivvah-saynah, zumm Sebna, deah es es kaynich-haus ivvah-saynd.

¹⁶Sawk zu eem, ‘Vass bisht du am du do, veah hott diah's recht gevva fa en grawb raus hakka fa dich selvaht, fa en grawb raus hakka hohch drovva, un en roo-blatz macha fa dich selvaht im felsa?

¹⁷Gebb acht, da HAH zayld yusht glei hohld nemma funn diah, un dich veeshtahlich vekk shmeisa, du mechtichah mensh.

¹⁸Eah zayld dich uf rolla vi en balla, un dich in en graysah land shmeisa. Datt zaylsht du shtauva, un datt zayla dei shayni greeks-veyya bleiva; du bisht en shohm zu dei meishtah sei haus!

¹⁹Ich nemm dei eahvet vekk funn diah, dei hohchah blatz vatt vekk gnumma funn diah.’

²⁰In sellem dawk roof ich mei gnecht, da Eliakim em Hilkia sei boo.

²¹Ich zayl een glaydah mitt dei rokk un zayl dei belt um een rumm du, un ich gebb eem da foah-gengah blatz es als dei voah. Eah zayld da faddah sei zu selli es in Jerusalem voona un zumm haus funn Juda.

²²Ich zayl da shlissel zumm haus fumm Dawfit uf sei shuldah du. Vass eah uf macht kann nimmand zu macha, un vass eah zu macht kann nimmand uf macha.

²³Ich shlakk een nei vi en zabba es goot fesht gmacht is; eah zayld da shtool funn grohsi eah havva im haus funn sei faddah.

²⁴Awl di hallichkeit funn seim faddah sei haus zayld an eem henka, sei kind un kinds-kinnah, un awl's glay ksha, funn bowls zu tsheahs.

²⁵In sellem dawk,” sawkt da Awlmechtich HAH, “zayld da zabba im feshta blatz nohch gevva, ab brecha un nunnah falla, un alles es druff henkt zayld nunnah falla un fabrocha gay.” Da HAH hott kshvetzt.