Read Pennsylvania German Jesoiya 3 Bible Online

Jesoiya 3 - Pennsylvania German bible

Jesoiya 3

¹Gukket nau da Hah, da Awlmechtich HAH, zayld iahra shtokk un alles es si sich druff falossa, vekk nemma funn Jerusalem un Juda, awl iahra ess-sach un awl iahra vassah,

²da mechtich mann un greeks-gnecht, da richtah un da brofayt, da voah-sawwah un da eldishtah,

³da Hauptmann mitt fuftzich mennah unnich sich, un da hohch-geaht mann, da roht-gevvah, da haendich shaff-mann, un da zaubahrah.

⁴Ich zayl yungi boova ivvah si du, un kinnah zayla si roola.

⁵Di leit zayla nannah nunnah dredda, mann geyyich mann, un nochbah geyyich nochbah. Di yunga leit zayla sich ufshtella geyyich di alda, selli unni eah geyyich selli mitt eah.

⁶An selli zeit zayld en mann ayns funn sei breedah graebba in sei daett sei haymet un zayld sawwa, “Du hosht alsnoch en vammes, sei unsah foah-gayyah; rool ivvah deah fadauva haufa.”

⁷Avvah eah zayld sawwa, “Ich kann nix du fa eich. Es is kenn ess-sach adda en vammes in meim haus, setz mich nett ivvah dee leit.”

⁸Yau, Jerusalem is kshtolbaht, un Juda is kfalla; iahra vadda un sell vass si doon is geyyich da HAH. Si shtella sich uf geyyich sei hallichkeit.

⁹Da vayk vi iahra ksichtah gukka zeikt geyyich si; si veisa iahra sinda fanna rumm es vi Sodom, si fashtekla si nett. Vay zu eena! Si henn grohsah druvvel uf sich selvaht gebrocht.

¹⁰Sawk zu di gerechta es es zayld goot gay mitt eena; si zayla di frucht funn iahra eahvet essa.

¹¹Avvah vay zu di gottlohsa, es zayld nett goot gay mitt eena. Si vadda zrikk betzawld fa vass si fadeend henn.

¹²Oh mei leit, kinnah sinn am eich nunnah dredda, veibsleit roola ivvah eich. Mei leit, selli es eich fiahra, doon eich letz fiahra, si drayya eich vekk funn di pawt.

¹³Da HAH nemd sei blatz fa richta, eah shtayt uf fa sei leit richta.

¹⁴Da HAH gayt in's gericht geyyich di eldishti un foah-gengah funn sei leit. “Diah sind selli es mei vei-goahra fadauva hend, un sell vass grawbt voah funn di oahma is in eiyah heisah.

¹⁵Vass maynet diah bei mei leit nunnah dredda, un bei di oahma iahra ksichtah famawla?” So sawkt da Hah, da Awlmechtich HAH.

¹⁶Da HAH sawkt, “Di veibsleit funn Zion sinn shtols, si lawfa mitt iahra kebb in di hay, un mitt lusht in di awwa, si lawfa rumm mitt katzi shritt, un macha di rings klingla an iahra fees.

¹⁷Fasell zayld da Hah grinda uf di veibsleit funn Zion iahra kebb bringa, un da HAH macht iahra kebb blutt.”

¹⁸In sellah dawk zayld da Hah iahra shmukk vekk nemma; iahra rings um di bay, di kobb-banda, di hals-kedlen,

¹⁹di kedda, di eahm-rings, di ksicht-dichah,

²⁰di kobb-dichah, di bay-kedlen, di duch-belts, di goot-shmakkich ayl-bodla, di oahra-rings,

²¹di fingah-rings, di naws-rings,

²²di feina rekk un mandla un ausahri glaydah, di geld-sekk,

²³di shpikla, di linnen glaydah, di heet, un iahra shawls.

²⁴In blatz funn goot-shmakkich ayl zayld's en veeshtah kshmakk sei; in blatz funn en duch-belt zayld's en shtrikk sei, in blatz funn shayni hoah zayld's en bluddah kobb sei, in blatz funn feini glaydah zayld's sekk-glaydah sei, in blatz funn shayheit zayld's shohm sei.

²⁵Eiyah mennah vadda nunnah kakt mitt em shvatt, un eiyah shteiki greeks-gnechta im greek.

²⁶Di shtatt-doahra funn Zion zayla veina un heila; di shtatt zayld leah sei un uf em bodda hokka.