Read Pennsylvania German Jesoiya 32 Bible Online

Jesoiya 32 - Pennsylvania German bible

Jesoiya 32

¹Gukk moll, es zayld en kaynich kumma es sei reich fiaht mitt gerechtichkeit, un sei mitt-helfah zayla richta vass recht is.

²Yaydahs funn eena zayld sei vi en blatz aus em vind, vi en blatz es ma sich fashtekla kann fumm shtoahm, vi en vassah-grikk es lawft in en drukka land, un vi da shadda funn en grohsah felsa in en drukkanah blatz.

³No doon selli es sayna kenna, iahra awwa nett zu macha un selli es heahra kenna, zayla goot abheicha.

⁴Di meinds funn di ungeduldicha zayla no sacha recht fashtay, un di zunga es shtoddahra zayla sacha recht sawwa.

⁵Selli unni veisheit zayla nimmi fanumma sei fa veisheit havva, un di uneahlicha fa eahlich sei.

⁶Sellah unni veisheit sawkt dummi sacha, un sei meind denkt evili sacha. Eah gayt ungettlichi sacha nohch, un sawkt letzi sacha veyyich em HAH, di hungahricha lost eah hungahrich, un funn di dashticha hald eah's vassah vekk.

⁷Da fafiahrah dutt ungettlichi sacha, eah shkeemd fa evil du, mitt leeya hald eah di oahma funn iahra recht greeya, even vann si sawwa vass voah is.

⁸Avvah da eahlich mensh dutt eahlichi sacha, un eah shtayt fa sell vass recht is.

⁹Diah veibsleit es so en faul layva fiahret, nemmet acht, un heichet mich ab, diah mayt es so unbekimmaht sinn, heichet vass ich zu sawwa habb!

¹⁰In bissel may es en yoah funn nau, zaylet diah es unbekimmaht sinn ziddahra; es zayld kenn drauva-eahn sei, un aw kenn annah obsht.

¹¹Ziddahret, diah veibsleit es en faul layva fiahret, druvlet eich, diah unbekimmahdi mayt! Nemmet eiyah glaydah ab, un doond sekk-glaydah um eich rumm.

¹²Heilet un shlauwet uf eiyah brisht, fa di shayni feldah un di fruchtboahra vei-goahra,

¹³un fa's land funn mei leit, dess es ivvah-gvaxa sei zayld mitt hekka un danna. Yau, heilet fa di heisah mitt fraylichi leit, un fa di fraylich shtatt.

¹⁴Es kaynich-haus zayld falossa sei, un di shtatt mitt feel leit vatt leah, da hivvel un da vatsh-tavvah vadda ayvichlich foll lechah fa diahra, en blesiah fa di vilda aysla, un vayt fa's fee,

¹⁵biss da Geisht ausgleaht is uf uns funn in di hay, un di vildahnis en fruchtboah feld vatt, un's fruchtboah feld gukt vi en bush.

¹⁶Eahlich richtes zayld no in di vildahnis sei, un gerechtichkeit im fruchtboahra feld.

¹⁷Di frucht funn gerechtichkeit zayld fridda sei, un sell vass aus gerechtichkeit kumd is shtilli roo un fadrauwes fa'immah.

¹⁸Mei leit zayla in fridda voona, mitt goodi haymeda, un in bletz funn shtilli roo.

¹⁹Even vann shlohsa di busha fadauva, un di shtatt nunnah gebrocha vatt,

²⁰vi ksaykend zayla diah sei, veil diah eiyah sohma bei awl di grikka sayya kennet, un eiyah fee un aysla ivvahrawlich vayda kennet.