Read Pennsylvania German Jesoiya 34 Bible Online

Jesoiya 34 - Pennsylvania German bible

Jesoiya 34

¹Kummet nayksht, diah heida, un heichet ab; heichet goot ab, diah leit! Loss di gans eaht heicha, un alles es drinn is, di gans veld, un alles es aus iahra kumd.

²Da HAH is zannich mitt awl di heida, un sei zann is geyyich awl iahra greeks-leit. Eah zayld si folshtendich umbringa, un gebt si ivvah fa kshlachta sei.

³Iahra kshlachtani vadda naus kshmissa, si fafaula un en heslichah kshmakk gayt ab funn eena; iahra bloot lawft ivvah di berga nunnah.

⁴Awl di shtanna in di himla zayla fagay, un da himmel vatt ufgrold vi ufgrold babiah; alles in di himla zayld falla vi velki bleddah funn di drauva-shtekk, vi farunseldi feiya funn di feiya-baym.

⁵Mei shvatt is satt funn drinka in di himla, nau gukket, es kumd runnah fa Edom richta, di leit es ich ausgmacht habb fa ausreiva.

⁶Es shvatt fumm HAH is foll bloot, un is satt funn fett, fumm bloot funn lemmah un gays, fumm niahra-fett funn shohf-bekk. Fa da HAH macht en opfah in Bozra un en grohsi shlacht in Edom.

⁷Vildi oxa vadda doht gmacht mitt eena, un aw yungi oxa un grohsi bulla. Iahra land zayld ksohkt sei mitt bloot, un da shtawb mitt fett.

⁸Fa da HAH zayld en dawk havva fa auseeva, en yoah fa di feinda funn Zion zrikk betzawla.

⁹Di revvahra funn Edom vadda zu pitch gedrayt, iahra grund drayt zu shvevvel, iahra land brend vi pitch.

¹⁰Es zayld nett ausgmacht vadda dawk adda nacht, da shmohk gayt in di hay fa'immah. Es land zayld leah leiya layves-zeit noch layves-zeit, un nimmand zayld may datt deich gay.

¹¹Avvah da voi un da nacht-owl zayla's aykna, da grohs-owl un di grabb macha iahra neshtah datt. Gott zayld's land funn Edom messa mitt di messa-shnuah funn fadauves, un mitt di plumb-line funn en leahrah blatz.

¹²Iahra evvahshti zayla nix datt havva es si en kaynich-reich haysa kenna, un iahra foah-gengah zayla nimmi datt sei.

¹³Danna kumma uf um iahra kaynich-heisah rumm, dishtla un hekka in di shtett mitt vanda, see vatt en blatz fa di faxa un di owls.

¹⁴Vildahnis diahra un vildi hund dreffa nannah oh datt, di vilda gays zayla bladda zu nannah. En nacht-geisht bleibt datt, un find en roo-blatz datt.

¹⁵Di owl-glukk hott iahra nesht datt, laykt oiyah, breet si raus, no geddaht see si in iahra shadda. Di voiya kumma zammah datt, yaydahs mitt iahra aykni satt.

¹⁶Gukket im buch fumm HAH un layset: Kens funn di diahra un fekkel zayla fafayld sei, si sinn awl in poahra. Fa em HAH sei maul hott's gebott gevva, un sei Geisht bringd si zammah.

¹⁷Eah zayld's land fadayla unnich eena, sei hand mest's aus fa si. Si nemma's ivvah un bleiva datt fa'immah, 's heaht zu eena layves-zeit noch layves-zeit.