Read Pennsylvania German Jesoiya 38 Bible Online

Jesoiya 38 - Pennsylvania German bible

Jesoiya 38

¹In selli dawwa is da Hiskia grank vadda un voah shiah doht. Da brofayt Jesoiya, em Amoz sei boo, is zu eem ganga un hott ksawt, “Dess is vass da HAH sawkt: Mach dei haus zvayk veil du shtauva zaylsht; du vasht nimmi ksund.”

²Da Hiskia hott sei ksicht zrikk gedrayt an di vand un hott zumm HAH gebayda,

³“Meindsht du, oh HAH, vi ich shtandhaftich gloffa binn fannich diah mitt en folkumma hatz un habb gedu vass diah kfellich voah?” Un da Hiskia hott biddahlich keild.

⁴No is es vatt fumm HAH zumm Jesoiya kumma:

⁵“Gay un sawk em Hiskia, ‘Dess is vass da HAH, da Gott funn deim faddah da Dawfit, sawkt: Ich habb dei gebayt keaht un habb dei awwa-vassah ksenna; ich gebb diah nochamohl fuftzay yoah fa layva.

⁶Un ich mach dich un dee shtatt frei funn di hand fumm kaynich funn Assyria. Ich zayl dee shtatt heeda.

⁷Dess is em HAH sei zaycha zu diah es da HAH dutt vass eah fashprocha hott:

⁸Ich mach da shadda funn di sunn uf di shtayk-drebba es da Ahas gebaut hott, zrikk gay fa zeyya drebba.’” No is da shadda zeyya drebba zrikk nuff ganga uf di shtayk.

⁹Dess is en shreives fumm Hiskia, da kaynich funn Juda, noch demm es eah ksund voah funn sei granket:

¹⁰Ich habb ksawt, “An di besht zeit funn mei layva, muss ich deich's doah fumm doht gay, un's ivvahrich funn mei layva vatt vekk gnumma?”

¹¹Ich habb ksawt, “Ich zayl da HAH nett viddah sayna, da HAH, in demm land funn di levendicha; nimmi lengah zayl ich mensha sayna, adda bei selli sei es in dee veld layva.

¹²Vi en shohf-heedah sei tent, voah mei haus nunnah gezowwa un vekk gnumma funn miah. Vi da vayvah en shtikk duch ufrold, noch demm es eah's abkshnidda hott fumm loom, so habb ich mei layva ufgrold. Dawk un nacht macht eah en end funn miah.

¹³Ich habb mich geduldich shtill gmacht biss meiyets, avvah eah hott awl mei gnocha fabrocha vi en layb; dawk un nacht macht eah en end funn miah.

¹⁴Ich habb gepiffa vi en shvalma un en vassah-fokkel, un habb gyammaht vi en daddel-daub; mei awwa voahra shvach vi ich nuff gegukt habb. Ich binn gedruvveld, oh Hah, helf miah!”

¹⁵Vass kann ich sawwa? Eah hott kshvetzt zu miah, un eah selvaht hott dess gedu, ich lawf daymeedich di ivvahricha funn mei yoahra, veil mei sayl biddah is.

¹⁶Oh Hah, leit layva bei dee sacha, un mei geisht find's layva drinn aw. Du hosht mich viddah ksund gmacht, un hosht mich glost layva.

¹⁷Es voah geviss fa mei goot, es es miah so bang voah. Du hosht mei sayl hatzlich ohgnumma, so es see nett fadauva gayt. Du hosht awl mei sinda hinnich dei bukkel gedu.

¹⁸Fa's grawb kann dich nett danka, un da doht kann dich nett preisa, un selli es nunnah in's grawb gayn, henn kenn hofning fa dei shtandhaftichkeit.

¹⁹Es sinn di levendicha es dich danka, so vi ich du heit; da faddah sawkt sei kinnah veyyich dei shtandhaftichkeit.

²⁰Da HAH zayld miah helfa, so zayla miah singa un shpeela, es ivvahricha funn unsah layva im tempel fumm HAH.

²¹Nau da Jesoiya hott ksawt katt, “Machet en shmiah mitt feiya un doond's uf da kshveah, no vatt eah viddah ksund.”

²²No hott da Hiskia kfrohkt katt, “Vass zayld da zaycha sei fa veisa es ich viddah nuff an da tempel fumm HAH gay kann?”