Read Pennsylvania German Jesoiya 40 Bible Online

Jesoiya 40 - Pennsylvania German bible

Jesoiya 40

¹Drayshtet, drayshtet mei leit, sawkt eiyah Gott.

²Shvetzet freindlich zu Jerusalem, un sawwet zu iahra es iahra haddah deensht ivvah is, un es iahra sinda fagevva sinn, un es see double di shtrohf grikt hott fumm HAH sei hand fa awl iahra sinda.

³En shtimm is am roofa un sawkt: “Rishtet en vayk deich di vildahnis fa da HAH, machet da vayk deich's drukka land grawt fa unsah Gott.

⁴Alli niddahrah blatz vatt ufkohva, un alli berg un hivvel vatt niddah gmacht; da unayva grund vatt ayva gmacht un di grobba bletz vadda glatt gmacht.

⁵Di hallichkeit fumm HAH vatt offenboah gmacht, un awl mensha mitt-nannah zayla's sayna, fa's maul fumm HAH hott kshvetzt.”

⁶En shtimm hott ksawt, “Roof naus!” Un ich habb ksawt, “Vass soll ich naus roofa?” “Awl mensha sinn vi graws, un awl iahra shtandhaftichi-leevi is vi di blumma im feld.

⁷Es graws favelkt un di blumma falla ab, veil em HAH sei ohften druff blohst. Yau, leit sinn geviss vi graws.

⁸Es graws favelkt un di blumma falla ab, avvah's vatt funn unsah Gott shtayt fa'immah.”

⁹Zion, du es goodi zeiya bringsht, gay nuff uf en hohchah berg. Jerusalem, du es goodi zeiya bringsht, hayb dei shtimm uf mitt macht, hayb si uf un feich dich nett. Sawk zu di shtett funn Juda, “Do is eiyah Gott!”

¹⁰Gukket moll, Gott da HAH kumd mitt macht, un sei oahm roold fa een. Gukket moll, sei lohn is mitt eem, un sei fadeensht gayt fannich eem.

¹¹Vi en shohf-heedah, gebt eah acht uf di drubb, eah geddaht di lemmah in sei eahm, un drawkt si in sei shohs; eah fiaht selli mitt yungi shloh.

¹²Veah hott di vassahra gmessa mitt em dalla funn sei hand, adda di himla abgmeikt bei sei hand naus shtrekka? Veah hott da shtawb funn di eaht gmessa mitt en koahb, adda di berga gvohwa mitt en gvicht, un di hivla mitt en vohk?

¹³Veah hott em Geisht fumm HAH ksawt vass zu du, adda veah es en roht-gevvah, hott eem roht gevva?

¹⁴Veah hott eah kfrohkt fa eem eisicht gevva, un veah hott eem da recht vayk gland? Veah hott een gland sacha vissa, un veah hott eem gvissa fa sacha fashtay?

¹⁵Geviss, di heida sinn gacht vi en drobb in en aymah, si sinn fanumma es vi shtawb uf en vohk; eah veekt di islands vi feinah shtawb.

¹⁶Even Lebanon iahra busha sinn zu vennich fa awldah feiyahra macha, adda iahra diahra zu vennich fa brand-opfahra.

¹⁷Fannich eem sinn awl di heida vi nix, eah nemd si fa nix veaht sei, un vennichah es nix.

¹⁸Mitt vemm, dann, fagleichsht du Gott? Mitt vass fa en ab-bild fagleichsht du een?

¹⁹En shaff-mann geest en fagleichnis, en gold-shmitt zeekt's ivvah mitt gold, un en silvah-shmitt macht silvah kedda difoah.

²⁰En mann es zu oahm is fa so en kshenk gevva, grikt sich hols es nett fafauld. Eah sucht en shmeahdah shaff-mann fa en fagleichnis ufsetza es nett vakkeld adda nunnah fald.

²¹Doond diah nett vissa? Hend diah nett keaht? Voah's eich nett ksawt fumm ohfang? Hend diah's nett fashtanna fumm ohfang funn di veld?

²²Eah hokt ovvich em ring funn di eaht, un di leit uf di eaht sinn vi hoi-shrekka. Eah shtrekt da himmel aus vi en curtain, vi en tent es leit drinn voona.

²³Eah bringd roolahs zu nix un macht di richtah funn di eaht nix veaht.

²⁴So kshvind es si geblanst sinn, so kshvind es si ksayt sinn, so kshvind es si eivatzla in di eaht, dann blohst eah uf si un si fadadda, un en vind-veahvel drawkt si vekk vi shprau.

²⁵“Mitt vemm doond diah mich fagleicha, es ich sei sett vi eah?” sawkt da Heilich Gott.

²⁶Hayvet eiyah awwa uf un gukket in di hay; veah hott awl dee shtanna gmacht? Eah fiaht si awl raus bei nambah, un rooft si awl bei iahra nayma. Sei macht un awlmechtichi graft is so grohs, es nett ayns funn eena fafayld gay zayld.

²⁷Favass shvetzet diah, oh Jakob, un faglawwet eich, oh Israel, un sawwet, “Mei vayk is fashtekkeld fumm HAH, mei Gott is nett bekimmaht veyyich mei recht”?

²⁸Doond diah nett vissa? Hend diah nett keaht? Da HAH is da ayvich Gott, deah es di endah funn di eaht kshaffa hott. Eah vatt nett shvach adda meet, nimmand kann begreifa vi eah sach fashtayt.

²⁹Eah gebt macht zu selli es matt sinn, un gebt graft zu di shvacha.

³⁰Even di yunga vadda meet un shvach, un di yunga mennah shtolbahra un falla.

³¹Avvah selli es voahra uf da HAH, zayla frishi graft greeya. Si zayla fleeya mitt flikkel vi di awdlah; si zayla shpringa un nett meet vadda, si zayla lawfa un nett shvach vadda.