Read Pennsylvania German Jesoiya 46 Bible Online

Jesoiya 46 - Pennsylvania German bible

Jesoiya 46

¹Da Bel beekt sich nunnah un da Nebo is kfalla. Iahra abgettah-gleichnisa sinn uf di bikkel funn oxa gedu. Di gleichnisa es diah rumm drawwet, sinn en lasht un sinn uf di meedi diahra gedu.

²Si beeya sich nunnah mitt-nannah, un kenna di lasht nett vekk nemma; si selvaht vadda in's kfengnis gnumma.

³“Heichet zu miah, diah fumm Jakob sei nohch-kummashaft, awl diah es noch ivvahrich sind fumm haus funn Israel, diah es ich keet habb funn eiyah muddahs-leib, un gedrawwa habb siddah es diah geboahra voahret.

⁴Even biss diah ald un veis-groh sind, dann binn ich sellah es eich drawkt. Ich habb eich gmacht un zayl eich drawwa. Ich drawk eich un mach eich frei.

⁵Veah doond diah mich gleich-shtella un mich fagleicha? Mitt vemm messet diah mich es ich eem gleich sei soll?

⁶Dayl leahra gold aus iahra sekk, un veeya silvah uf di vohk; no dinga si en gold-shmitt fa en gott raus macha, un gneeya sich nunnah un deena's.

⁷Si hayva's uf iahra shuldahra un drawwa's, si setz es an en blatz un datt shtayt's. Es kann nett vekk gay funn datt. Vann ebbah shvetzt ditzu, gebt's kenn andvat, un's kann eem nett helfa in sei noht.

⁸Fagesset dess nett avvah denket drivvah; nemmet's zu hatz, diah ivvah-dreddah.

⁹Meindet vass blatz gnumma hott lang zrikk. Ich binn Gott, un's hott kenn anra; ich binn Gott, un's is nimmand vi ich.

¹⁰Ich mach's end gvissa fumm ohfang, un funn lang zrikk biss vass noch am kumma is. Vass ich du vill, zayld shtay, un ich du sell es ich du vill.

¹¹Ich roof en awdlah funn di east, un funn en land veit ab, en mann fa mei villa du. Vass ich ksawt habb, sell zayl ich du; vass ich im sinn habb, sell doon ich.

¹²Heichet mich oh, diah mitt shteibahrichi hatza, diah es veit funn gerechtichkeit sind.

¹³Ich bring mei gerechtichkeit nayksht, es is nett veit ab; mei hilf zayld nett shpoht sei. Ich gebb saylichkeit zu Zion, un mei hallichkeit zu Israel.”