Read Pennsylvania German Jesoiya 52 Bible Online

Jesoiya 52 - Pennsylvania German bible

Jesoiya 52

¹Vekk uf, Zion, vekk uf, glayt dich mitt graft. Du dei shayni glaydah oh, du heilichi shtatt, Jerusalem. Kenn unbeshniddanah adda unreinah zayld may in dich nei kumma.

²Shiddel da shtawb ab. Shtay uf, Jerusalem, du es kfanga bisht; mach dich lohs funn di kedda um dei hals rumm, du kfangani dochtah funn Zion.

³Dess is vass da HAH sawkt: “Du voahsht fakawft fa nix un du vasht frei gmacht unni geld.”

⁴Dess is vass Gott da HAH sawkt: “Seahsht sinn mei leit nunnah in Egypta ganga fa datt voona vi auslendah, no henn di Assyrians si nunnah gedredda unni uahsach.

⁵Nau vass havvich do?” sawkt da HAH. “Mei leit voahra vekk gnumma fa nix, un selli es ivvah si sinn fashpodda si, un mei nohma is faleshtaht da gans dawk lang,” sawkt da HAH.

⁶“Fasell zayla mei leit mei nohma vissa, un fasell zayla si vissa in sellem dawk es ich ksawt habb, ‘Do binn ich.’”

⁷Vi leeblich uf di berga sinn di fees funn sellah es goodi zeiya bringd, sellah es fridda ausrooft, sellah es es fraylich vatt bei bringd, sellah es di saylichkeit breddicht, un sellah es sawkt zu Zion, “Dei Gott is kaynich!”

⁸Heich moll, di vatsh-mennah roofa mitt laudi shtimma, si greisha zammah mitt frayt; fa si sayna mitt iahra aykni awwa, da HAH am zrikk kumma zu Zion.

⁹Seind fraylich un singet zammah, diah fadauvani bletz in Jerusalem, fa da HAH hott sei leit gedraysht un hott Jerusalem frei ksetzt.

¹⁰Da HAH hott sei heilichah oahm blutt gmacht fannich di awwa funn awl di heida, un di endah funn di gans eaht zayla di saylichkeit funn unsah Gott sayna.

¹¹Gaynd vekk, gaynd vekk funn datt! Rayyet kenn unrein ding oh! Gaynd aus iahra, un reinichet eich, diah es em HAH sei tempel-ksha drawwet.

¹²Avvah diah brauchet eich nett dumla vi diah gaynd, es vann diah am fatt shpringa veahret, fa da HAH zayld fannich eich heah gay, un da Gott funn Israel zayld eich heeda hinna nohch.

¹³Gukk moll, mei gnecht zayld alles ausfiahra mitt veisheit, eah vatt hohch ufkohva un hohch gacht.

¹⁴Feel voahra fashtaund vo si een ksenna henn, sei leib voah so faveesht es es nett gegukt hott vi en mensh, adda vi's leib funn mensha-kinnah.

¹⁵So aw zayla feel heida fashtaund sei, un kaynicha iahra meilah zu halda deich een. Vass si nett ksawt gvest voahra, zayla si sayna, un vass si nett keaht katt henn, zayla si fashtay.