Read Pennsylvania German Jesoiya 53 Bible Online

Jesoiya 53 - Pennsylvania German bible

Jesoiya 53

¹Veah hott geglawbt vass miah nau sawwa, un zu vemm voah di graft fumm HAH sei oahm gvissa?

²Eah is ufgvaxa fannich eem vi en blansa, vi en vatzel in drukkanah grund. Eah voah nett shay adda hohch-eahlich es miah een ohgukka sedda. Nix fa een ohgukka sett uns zu eem zeeya. Miah sedda nett zu eem gezowwa sei bei een ohgukka.

³Eah voah gezayld vi nix, un voah nett ohgnumma bei mensha, en mann mitt dreebsawl un shmatza. Eah voah aynah es leit nett ohgegukt henn. Eah voah gezayld vi drekk, un miah henn nix zu du havva vella mitt eem.

⁴Doch hott eah unsah grankeda uf sich selvaht gnumma, un unsah shmatza gedrawwa; avvah miah henn gmaynd eah voah am kshtrohft un kshlauwa vadda bei Gott, un in aylenda glost.

⁵Avvah eah voah vay gedu fa unsah ivvah-dreddes, un voah kshlauwa fa unsah sinda. Uf eem leit di shtrohf es uns fridda gebt, un deich sei shtraych, sinn miah kayld.

⁶Miah voahra awl vi shohf es sich faloahra henn; yaydahs funn uns is sei ayknah vayk ganga. Un da HAH hott awl unsah sinda uf een glaykt.

⁷Eah voah veesht gyoost un vay gedu, avvah eah hott sei maul nett uf gmacht; vi en lamm kfiaht vatt fa kshlacht sei, un vi en shohf shtill is fannich di sheahrah, so hott eah sei maul nett uf gmacht.

⁸Aus em kfengnis un di gericht, voah eah vekk gnumma; un veah funn sei zeit hott sich bekimmaht, es eah aus em land funn di levendicha gnumma voah, un es eah kshlauwa voah fa di sinda funn mei leit?

⁹Eah voah in en grawb gedu mitt di gottlohsa, un mitt di reicha in seim doht, even vann eah nix letzes gedu hott, un kenn falshheit in seim maul gvest voah.

¹⁰Doch voah's em HAH sei villa fa een shlauwa mitt grankheit un dreebsawl. Un veil eah sich gopfaht hott fa sinda, zayld eah sei nohch-kummashaft sayna un sei layva falengahra. Un em HAH sei villa vatt ausgedrawwa bei sei hand.

¹¹Veil sei sayl so feel glidda hott, zayld eah's licht fumm layva sayna un zufridda sei. Bei sei eisicht, zayld mei Gerechtah Gnecht feel leit gerecht macha, un zayld iahra sinda drawwa.

¹²Fasell gebb ich eem en dayl unnich di hohch-gachta, un sell es gnumma vatt zayld eah fadayla mitt di mechticha, veil eah sei layva ausgleaht hott zumm doht un voah gnambaht mitt di sindah. Eah hott di sinda gedrawwa fa feel, un hott gebayda fa di ivvah-dreddah.