Read Pennsylvania German Jesoiya 54 Bible Online

Jesoiya 54 - Pennsylvania German bible

Jesoiya 54

¹“Sing, du unfruchtboahri fraw, du es nee kenn kind katt hosht; froi dich mitt singes, greish mitt frayt, du es nee kenn kind-shmatza katt hosht; veil di fraw es falossa vadda is may kinnah havva zayld es selli es en mann hott,” so sawkt da HAH.

²“Mach da blatz funn deim tent graysah, shtrekk di curtains ausnannah, hayb si nett zrikk. Mach di shtrikk lengah, un di shtikkel shteikah.

³Fa du zaylsht ausnannah gay, uf di rechts un di lings seit. Dei nohch-kummashaft zayld di heida ivvah-nemma, un in iahra leahri shtett voona.

⁴Feich dich nett, du zaylsht dich nett shemma, sei nett gedruvveld, du vasht nett fashohmd; dei shohm vo du yung voahsht zaylsht fagessa, un zaylsht nimmi droh denka an dei faniddahres, vo du en vitt-fraw vadda bisht.

⁵Fa deah es dich gmacht hott is dei mann, sei nohma is da Awlmechtich HAH. Eah is da Heilich Gott funn Israel, eah macht dich saylich, deah Gott funn di gans veld.

⁶Da HAH hott dich zu sich groofa, vi en falossani fraw es bedreebt is im geisht— en fraw es yung keiyaht hott un voah no falossa,” sawkt dei Gott.

⁷“Fa en glenni zeit habb ich dich falossa, avvah mitt grohsi leevi bring ich dich zrikk.

⁸Mitt en shnellah ohfang funn zann, habb ich mei ksicht fashtekkeld funn diah fa vennich, avvah mitt ayvichi leevi, zayl ich bamhatzich sei zu diah,” sawkt da HAH es dich saylich macht.

⁹“Zu miah, dess is vi di dawwa fumm Noah, vo ich kshvoahra habb es di vassahra fumm Noah di eaht nee nimmi zu dekka zayla. So nau habb ich kshvoahra fa nimmi zannich sei mitt diah, un dich nee nimmi zanka.

¹⁰Di berga mechta kshiddeld vadda, un di hivla vekk gnumma sei, doch mei shtandhaftichi-leevi fa dich vatt nett kshiddeld, un mei bund funn fridda vekk gnumma,” sawkt da HAH, es bamhatzich is zu diah.

¹¹“Oh du aylendichi shtatt, fashtoahmd un nett gedraysht, ich vill dich bauwa mitt keshtlichi shtay, dei mavvahra mitt sapphire-shtay.

¹²Ich mach dei tavvahs mitt rubies, un dei doahra mitt crystals un dei vanda mitt keshtlichi shtay.

¹³Awl dei kinnah vadda gland beim HAH; si zayla kinnah sei mitt grohsah fridda.

¹⁴In gerechtichkeit zaylsht du gegrund vadda; du zaylsht veit vekk funn nunnah-dreddes sei, un brauchsht dich nett feicha. Fagelshtaht sei is veit vekk, un kumd nett nayksht zu diah.

¹⁵Vann ennich ebbah shtreida dutt mitt diah, dann kumd's nett funn miah. Veah-evvah es shtreit ufshtatt mitt diah, zaylsht du di ivvah-hand greeya drivvah.

¹⁶Gukket moll, ich habb da shmitt kshaffa, deah es di kohla im feiyah blohst, un macht's greeks-ksha fa gyoost sei; avvah's voah aw mich es da fadeahvah gmacht hott, fa dess alles zu nix bringa.

¹⁷Kenn greeks-ksha, es gmacht is fa geyyich dich sei, zayld goot ausshaffa, un alli zung es geyyich dich is im gericht, zaylsht du fadamma. Dess is di eahbshaft fa di gnechta fumm HAH, un iahra gerechtichkeit is funn miah,” sawkt da HAH.