Read Pennsylvania German Jesoiya 56 Bible Online

Jesoiya 56 - Pennsylvania German bible

Jesoiya 56

¹Dess is vass da HAH sawkt: “Haldet vass recht is, un doond gerechtichkeit, fa mei saylichkeit is nayksht, un mei gerechtichkeit vatt gvissa.

²Ksaykend is da mann es dess dutt, un da mensh es es pinklich hald, sellah es da Sabbat hald un en nett unheilich macht, un sei hand hald funn ennich evil do.”

³Da auslendah es sich gebunna hott zumm HAH sett nett sawwa, “Da HAH zayld mich vekk halda funn sei leit.” Un ebbah es beshnidda is sett nett sawwa, “Ich binn yusht en ufgedrikkeldah bohm.”

⁴Dess is vass da HAH sawkt: “Di beshniddana es mei Sabbat halda un ausmacha fa du vass miah kfellich is un es mei bund halda,

⁵zu eena gebb ich en ohdenkes in meim haus un in di tempel vanda, en nohma es bessah is es boova un mayt; ich gebb eena en ayvichah nohma es nee nett abkshnidda vatt.

⁶Un auslendah es sich zumm HAH binna fa een deena, fa em HAH sei nohma leeb havva, un fa sei gnechta sei, un selli es da Sabbat halda unni en unheilich macha, un es mei bund halda,

⁷selli zayl ich zu meim heilicha berg bringa un si fraylich macha in meim bayt-haus. Iahra opfahra un brand-opfahra vadda ohgnumma uf meim awldah; fa mei haus zayld en bayt-haus kaysa sei fa alli leit.”

⁸Da Awlmechtich HAH, deah es di naus-kshtohsana funn Israel zammah sammeld, sawkt: “Ich sammel aw anri zu eena, nayvich selli es shund ksammeld sinn.”

⁹Kummet, awl diah diahra im feld, kummet un fresset, awl diah diahra im bush.

¹⁰Israel iahra vatsh-mennah sinn blind, si vissa nix; si sinn awl dummi hund, es nett gautza kenna. Si leiya rumm un drohma, si gleicha shlohfa.

¹¹Si sinn greedichi hund, es nett satt vadda, si henn nee nett genunk. Si sinn shohf-heedah es nix fashtayn, si gayn iahra ayknah vayk, si gukka yusht aus fa sich selvaht, alli vann funn eena.

¹²Yaydahs funn eena greisht, “Kummet, vella vei greeya! Vella uns foll saufa! Meiya zayld sei vi heit, adda even bessah.”