Read Pennsylvania German Jesoiya 57 Bible Online

Jesoiya 57 - Pennsylvania German bible

Jesoiya 57

¹Di gerechta kumma um, un nimmand nemd's zu hatz; gettlichi mennah vadda vekk gnumma, un nimmand fashtayt's es di gerechta vekk gnumma sinn fa si aus di kfoah fumm evila halda.

²Selli es ufrichtich lawfa, zayla fridda havva; si finna roo im dohdes-bett.

³“Avvah diah, kinnah funn en veibsmensh zaubahrah, kummet do heah, diah kinnah funn aybrechah un huahra!

⁴Veah sind diah am fashpodda? Geyyich veah machet diah eiyah maul grohs uf un shtekket eiyah zung raus? Sind diah nett kinnah funn ivvah-dreddah, kinnah funn leeyah?

⁵Diah brennet mitt lusht unnich di aycha-baym, un unnich alli greenah bohm; diah opfahret eiyah kinnah in di deicha, un unnich felsa es ivvah-henka.

⁶Di abgettah bei di gladda shtay in di deicha heahra zu diah, si sinn dei dayl; zu eena hosht du drink-opfahra ausgleaht, un shpeis-opfahra gopfaht. Soll ich dee sacha ohnemma?

⁷Du hosht dei bett gmacht ovva uf en hohchah hivvel; datt hosht du dei opfahra gmacht.

⁸Hinnich di deah un em deah-poshta, hosht du dei abgott-zaycha kanka. Du hosht mich falossa, un dei bett abgedekt, du bisht in's bett un hosht's grohs uf gmacht. Du hosht en bund gmacht mitt eena, un gleichsht iahra beddah, un iahra nakkichheit sayna.

⁹Du bisht zumm abgott Molech ganga mitt ayl, un mitt feel goot-shmakkich ayl. Du hosht leit mitt dei vatt veit vekk kshikt, even so veit es es grawb.

¹⁰Du bisht laydich vadda funn awl dei vayya, avvah du hosht nett ksawt, ‘Ich gebb uf.’ Du hosht yusht noch may grefta kfunna, un bisht nett meet vadda.

¹¹Veah hosht du dich kfeicht diveyya, es du gleekt hosht un mich fagessa hosht, un aw nett an mich gedenkt hosht? Voah's nett veil ich so lang shtill voah, un du hosht mich nimmi kfircht?

¹²Ich zayl dei gerechtichkeit un verka abdekka, un si zayla diah nett helfa.

¹³Vann du roofsht fa hilf, dann loss awl dei abgettah diah helfa! Da vind zayld si awl fatt drawwa, en glennah ohften blohst si vekk. Avvah da mensh es in mich draut, zayld's land aykna, un mei heilichah berg eahva.”

¹⁴Un's vatt ksawt: “Bauwet uf, bauwet uf, rishtet da vayk! Nemmet alli shtolbah-blakk aus em vayk funn mei leit.”

¹⁵Dess is vass da Hohch un Heilich Gott sawkt— deah es ayvich laybt un es da nohma “Heilich” hott: “Ich voon in en hohchah un heilichah blatz, un aw mitt selli es bekeaht un daymeedich im geisht sinn, so es ich da geisht greftich macha kann funn selli es daymeedich sinn, un's hatz funn selli es bekeaht sinn.

¹⁶Ich zayl nett immah pshuldicha, un aw nett immah zannich sei, veil iahra geisht matt vadda dayt fannich miah, un aw da ohften im mann es ich gmacht habb.

¹⁷Ich voah zannich veil eah so sindlich un greedich voah, ich habb een kshtrohft, un mei ksicht fashtekkeld in meim zann. Avvah eah hott ohkalda vekk drayya, un sei ayya hatz nohch gay.

¹⁸Ich habb sei vayya ksenna, avvah ich zayl een hayla; ich zayl een fiahra, un selli drayshta es heila,

¹⁹un preis shaffa uf iahra leftz. Fridda, fridda, zu selli es veit ab sinn, un zu selli es nayksht sinn,” sawkt da HAH, “un ich zayl si hayla.”

²⁰Avvah di gottlohsa sinn vi da unruich say, es nett ruich sei kann, un sei vella bringa drekk un mud ruff.

²¹“Es hott kenn fridda,” sawkt mei Gott, “fa di gottlohsa.”