Read Pennsylvania German Jesoiya 62 Bible Online

Jesoiya 62 - Pennsylvania German bible

Jesoiya 62

¹Fa di sayk funn Zion zayl ich nett shtill sei, un fa di sayk funn Jerusalem zayl ich nett roowa, biss iahra gerechtichkeit sheind mitt helling, un iahra saylichkeit brend vi en feiyah-shtekka.

²Di heida zayla dei gerechtichkeit sayna, un awl di kaynicha dei hallichkeit; du vasht kaysa bei en neiyah nohma, es es maul fumm HAH diah gebt.

³Du vasht en shaynah krohn im HAH sei hand, en kaynich-hoot in di hand funn deim Gott.

⁴Du solsht nimmi “Falossa” kaysa sei, un dei land vatt nimmi “Leah” kaysa. Avvah du zaylsht “Em HAH Sei Leeblichi” kaysa sei un dei land vatt “Keiyahdi Fraw” kaysa, veil du em HAH leeblich bisht, un dei land keiyaht vatt zu eem.

⁵So vi en yungah mann en leddich maydel heiyaht, so zayla dei boova dich heiyahra; un vi en hochtzich-mann sich froit ivvah sei hochtzich-maydel, so zayld dei Gott sich froiya ivvah dich.

⁶Ich habb vatsh-mennah uf dei mavvahra gedu, oh Jerusalem, si zayla nee nett shtill sei, dawk un nacht. Diah es ohhaldet da HAH droh gmohna, nemmet kenn roo selvaht.

⁷Un gevvet eem kenn roo, biss eah Jerusalem ufsetzt un macht see glohbt ivvah di gans eaht.

⁸Da HAH hott kshvoahra bei sei rechtsi hand, un bei sei mechtichah oahm: “Selayva zayl ich dei frucht nimmi gevva fa ess-sach zu dei feinda, un selayva zayla di fremda da nei vei nimmi drinka es du so hatt kshaft hosht difoah;

⁹avvah selli es es eahnda zayla's essa, un da HAH lohva, un selli es di drauva samla zayla da vei drinka, in di foah-hayf funn mei tempel.”

¹⁰Gaynd deich, gaynd deich di doahra! Rishtet da vayk fa di leit. Bauwet da vayk, bauwet da vayk, nemmet di shtay ab. Hayvet da flag uf ivvah di leit.

¹¹Gukket moll, da HAH lost's heahra zu di endah funn di eaht: “Sawk zu di Dochtah funn Zion, ‘Gukk moll, dei Heiland is am kumma, eah bringd sei lohn mitt sich, selli es eah frei gmacht hott gayn fanna heah.’”

¹²Si zayla “Di Heilicha Leit” kaysa sei, “Di Leit Es Da HAH Saylich Gmacht Hott.” Un du vasht “Raus Ksucht” kaysa, “Di Shtatt Es Nimmi Falossa Is.”