Read Pennsylvania German Jesoiya 64 Bible Online

Jesoiya 64 - Pennsylvania German bible

Jesoiya 64

¹Oh, ich vott du daytsht di himla ufreisa un daytsht runnah kumma, so es di berga shidla dayda fannich diah!

²So vi vann feiyah kindling ohshtekt un macht vassah kocha, kumm runnah un mach dei nohma bekand zu dei feinda, so es di heida ziddahra fannich diah!

³Vo du vundahboahri sacha gedu hosht es miah nett gegukt henn difoah, bisht du runnah kumma, un di berga henn kshiddeld fannich diah.

⁴Siddah aldi zeida hott nimmand keaht, adda fanumma deich sei oah, un kenn awk hott ennichah Gott ksenna, es vi yusht dich; deah es shaft fa selli es voahra uf dich.

⁵Du kumsht zu selli es fraylich sinn am gerechtichkeit du, un es an dei vayya denka. Avvah du voahsht bays vo miah ohkalda henn sindicha, so vi sella miah saylich vadda?

⁶Awl funn uns sinn vadda vi selli es unrein sinn; awl unsah gerechti verka sinn vi drekkichi lumba, miah favelka vi bleddah un unsah sinda drawwa uns vekk vi da vind.

⁷Nimmand rooft dei nohma oh, adda broviaht hohld nemma funn diah; du hosht dei ksicht fashtekkeld funn uns un losht uns fagay in di macht funn unsah sinda.

⁸Doch, oh HAH, du bisht unsah Faddah. Miah sinn da clay, un du bisht da heffa-machah; awl funn uns sinn di eahvet funn dei hand.

⁹Sei nett zu bays mitt uns, oh HAH, un denk nett an unsah sinda fa'immah. Gukk runnah uf uns awl fa miah sinn dei leit.

¹⁰Dei heilichi shtett sinn en vildahnis vadda, un so is Zion, Jerusalem is en leahrah blatz.

¹¹Unsah heilichah un shaynah tempel, vo unsah foah-feddah dich glohbt henn, voah fabrend mitt feiyah; un alles es uns leeb voah leit fadauva uf en haufa.

¹²Zaylsht du unbekimmaht bleiva, oh HAH, un dich zrikk hayva? Zaylsht du shtill bleiva, un uns lossa leida?