Read Pennsylvania German 3. Mosi 1 Bible Online

3. Mosi 1 - Pennsylvania German bible

3. Mosi 1

¹Da HAH hott da Mosi groofa, hott kshvetzt zu eem fumm fasamling-tent un hott ksawt,

²“Shvetz zu di Kinnah-Israel un sawk zu eena, ‘Vann ennich's funn eich en opfah zumm HAH bringa vill, soll eah en opfah bringa fumm fee es kee un shohf sinn.

³Vann sei opfah en brand-opfah fumm fee is, soll eah en bull opfahra es nix letz is mitt. Eah soll's opfahra am doah fumm fasamling-tent so es da HAH's ohnemd.

⁴Eah soll sei hand uf da kobb fumm brand-opfah layya, so es es ohgnumma vatt fa een selvaht un es sei sinda vekk gnumma vadda.

⁵Eah soll da yung bull shlachta fannich em HAH, un em Aaron sei boova di preeshtah sella's bloot nemma un's ivvah di fiah seida fumm awldah shpritza am doah fumm fasamling-tent.

⁶Eah soll no di haut abnemma fumm brand-opfah un's opfah in shtikkah shneida.

⁷Em Aaron sei boova di preeshtah sella feiyah uf da awldah du un hols ovva uf's feiyah du.

⁸No sella em Aaron sei boova di preeshtah di shtikkah flaysh, da kobb un's fett ivvah's feiyah un hols layya uf em awldah.

⁹Di deahm un di bay soll eah vesha mitt vassah. Da preeshtah soll alles ufbrenna uf em awldah fa en brand-opfah. Dess is en brand-opfah mitt feiyah fa en goodah kshmakk zumm HAH.

¹⁰Vann eah en opfah macht funn shohf adda gays fa en brand-opfah, dann muss es en bokk sei es nix letz is mitt.

¹¹Eah soll's shlachta uf di natt seit fumm awldah fannich em HAH, un em Aaron sei boova di preeshtah sella's bloot veddah da awldah shpritza uf di fiah seida.

¹²Eah soll's flaysh in shtikkah shneida un da preeshtah soll di shtikkah mitt em kobb un's fett ivvah's feiyah un hols layya uf em awldah.

¹³Avvah di deahm un di bay soll eah vesha mitt vassah. Da preeshtah soll no alles ufbrenna uf em awldah. Dess is en brand-opfah, en opfah gmacht bei feiyah fa en goodah kshmakk zumm HAH.

¹⁴Vann sei opfah zumm HAH en brand-opfah funn fekkel is, soll eah daddel-dauva adda yungi dauva opfahra.

¹⁵Da preeshtah soll's an da awldah bringa, sei kobb abdrayya un's fabrenna uf em awldah. Sei bloot soll raus glost vadda un uf di seit fumm awldah nunnah lawfa.

¹⁶Eah soll da grobb un di feddahra nemma un si uf di east seit fumm awldah shmeisa an da blatz vo di esh is.

¹⁷Eah soll's nemma bei di flikkel un's uf shpalda, avvah's nett gans funn-nannah shpalda. Da preeshtah soll's no fabrenna uf em hols un feiyah fumm awldah. Es is en brand-opfah, en opfah gmacht mitt feiyah fa en goodah kshmakk zumm HAH.’”