Read Pennsylvania German 3. Mosi 19 Bible Online

3. Mosi 19 - Pennsylvania German bible

3. Mosi 19

¹No hott da HAH ksawt zumm Mosi,

²“Shvetz zu awl di Kinnah-Israel un sawk eena, ‘Diah sellet heilich sei veil ich, eiyah Gott, heilich binn.

³Yaydah funn eich soll sei maemm un daett eahra, un diah sellet mei Sabbat-Dawwa halda. Ich binn da HAH eiyah Gott.

⁴Drayyet nett zu abgott-gleichnisa un machet eich aw nett gegossani gettah. Ich binn da HAH eiyah Gott.

⁵Vann diah en dank-opfah opfahret zumm HAH, opfahret's in so en vayk es es ohgnumma vatt.

⁶Es soll gessa sei uf em dawk es es gopfaht voah, adda da neksht dawk. Ennich ebbes es ivvahrich is uf em dridda dawk muss fabrend sei.

⁷Vann ennich's difunn gessa vatt uf em dridda dawk, dann is es unrein un's vatt nett ohgnumma.

⁸Veah-evvah es es est muss sei shuld drawwa veil eah unrein gmacht hott vass heilich is zumm HAH. Sellah mensh muss abkshnidda sei funn sei leit.

⁹In di eahn vann du dei feldah abmachsht, gay nett gans naus an di fens un aw nett in di ekkah; un gay nett zrikk un lays uf vass ivvahrich gvest voah.

¹⁰Gay nett's zvett mohl ivvah dei vei-goahra fa di drauva uflaysa es nunnah kfalla sinn. Loss si fa di oahma un di fremda. Ich binn da HAH eiyah Gott.

¹¹Diah sellet nett shtayla. Diah sellet nett leeya. Diah sellet nannah nett fafiahra.

¹²Diah sellet nett falsh shveahra bei meim nohma un da nohma funn eiyah Gott unrein macha. Ich binn da HAH.

¹³Du solsht dei nochbah nett uneahlich yoosa adda rawva. Hald nett da lohn funn dei gnecht zrikk biss da neksht dawk.

¹⁴Du solsht en dawbah mann nett faflucha, un aw nix imma blindah mann sei vayk du fa een shtolbahra macha, avvah du solsht dei Gott firchta. Ich binn da HAH.

¹⁵Diah sellet nett uneahlich sei in eiyah gericht. Diah sellet kenn unnahshitt macha fa di oahma, un aw di mechticha nett bei-shtay. Avvah diah sellet feah sei vann diah eiyah nochbah richtet.

¹⁶Du nett kshvetzah drawwa unnich dei leit, un du solsht nix du es dei nochbah sei layva in di kfoah dutt. Ich binn da HAH.

¹⁷Du solsht kenn hass halda in deim hatz geyyich ennich ebbah, avvah du daufsht dei nochbah recht setza, so es du kenn dayl hosht in sei shuld.

¹⁸Du solsht nett zrikk betzawla adda en hass hayva geyyich ennichs funn dei leit, avvah du solsht dei nochbah leeva vi dich selvaht. Ich binn da HAH.

¹⁹Diah sellet mei gebodda halda. Losset nett zvay sadda funn eiyah fee zammah kumma fa sich fameahra; diah sellet nett zvay sadda sohma sayya im sayma feld; un diah sellet kenn glaydah veahra es gmacht sinn funn zvay sadda duch.

²⁰Vann en mann shlohft mitt en deensht-mawt es fashprocha is zu en anra mann, avvah see voah nett frei gekawft bei sellem mann, dann missa si awl zvay kshtrohft sei. Avvah si braucha nett doht gmacht sei veil see nett frei voah.

²¹Avvah da mann muss en shohf-bokk zumm preeshtah bringa fa en shuld-opfah am doah fumm fasamling-tent.

²²Da preeshtah soll da shohf-bokk opfahra fa da mann es en shuld-opfah fannich em HAH. Dess is fa di sind es da mann gedu hott, un sei sind soll fagevva sei.

²³Vann diah in's land kummet un blanset alli sadda obsht-baym, dann soll's obsht unrein un fabodda sei zu eich fa drei yoah. Diah sellet's ohsayna es fabodda fa drei yoah un's nett essa.

²⁴Avvah im fiahda yoah zayld awl's obsht heilich sei fa en preis-opfah zumm HAH.

²⁵No im fimfda yoah daufet diah's obsht essa. Sellah vayk greeya eiyah baym may obsht. Ich binn da HAH eiyah Gott.

²⁶Diah sellet kenn flaysh essa mitt em bloot noch drinn. Diah sellet nett zaubahrei adda hexahrei dreiva.

²⁷Diah sellet eiyah hoah uf em kobb nett rund abshneida un eiyah beaht nett trimma.

²⁸Diah sellet kenn shnitt in eiyah leib macha vann diah veinet fa di dohda un aw kenn meiks uf eich macha. Ich binn da HAH.

²⁹Du solsht dei maydel nett fashanda bei see in huahrahrei dreiva, adda's gans land drayt zu huahrahrei un vatt foll ungettlichkeit.

³⁰Diah sellet mei Sabbat-Dawwa halda un mei heilichah fasamling-tent hohch achta. Ich binn da HAH.

³¹Haldet eich nett uf mitt voah-sawwah un zaubahrah. Gaynd nett gukka fa si, veil diah unrein vaddet deich si. Ich binn da HAH eiyah Gott.

³²Shtay uf fannich di grohwa kebb, eah di eldra un fircht dei Gott. Ich binn da HAH.

³³Vann en fremdah in eiyah land voond, doond eem nix letzes.

³⁴En fremdah es mitt eich voond in eiyah land soll sei zu eich es vi ayns funn eich. Diah sellet een leeb havva es vi eich selvaht, fa diah voahret aw fremdi im land funn Egypta. Ich binn da HAH eiyah Gott.

³⁵Seind nett uneahlich vann diah di leng un gvicht messet, adda vann diah ebbes raus messet.

³⁶Diah misset eahlichi vohwa un gvichtah havva, un aw eahlich sei vann diah frucht adda ebbes vassahrich messet. Ich binn da HAH eiyah Gott, deah es eich aus Egypta gebrocht hott.

³⁷Diah sellet awl mei gebodda un adninga halda un si du. Ich binn da HAH.’”