Read Pennsylvania German 3. Mosi 2 Bible Online

3. Mosi 2 - Pennsylvania German bible

3. Mosi 2

¹“‘Vann ennich ebbah en shpeis-opfah zumm HAH bringd, soll sei opfah gmacht sei funn fei mayl. Eah soll ayl druff leahra, insens druff du,

²un's zumm Aaron sei boova di preeshtah bringa. Da preeshtah soll no en hand-foll fumm fei mayl un ayl nemma mitt em insens, un soll's fabrenna uf em awldah fa en gedenknis. Es is en opfah gmacht bei feiyah fa en goodah kshmakk zumm HAH.

³Es ivvahricha fumm shpeis-opfah heaht zumm Aaron un sei boova. Es is es alli-heilichsht dayl funn di opfahra es gmacht sinn zumm HAH mitt feiyah.

⁴Vann du en shpeis-opfah bringsht es gebakka is in en offa, dann soll's unksavvahdi kucha sei, gmacht funn fei mayl mitt ayl nei gmixt, adda unksavvahdi kichlen es kshmiaht sinn mitt ayl.

⁵Vann dei shpeis-opfah gmacht is in en pann fa bakka, dann soll's gmacht sei funn fei mayl gmixt mitt ayl unni yeast.

⁶Du solsht's uf brokla un ayl druff leahra; es is en shpeis-opfah.

⁷Vann dei shpeis-opfah gmacht is in en pann fa brohda, dann soll's gmacht sei mitt fei mayl un ayl.

⁸Vann du en shpeis-opfah zumm HAH bringsht es gmacht is funn demm sach, dann solsht's zumm preeshtah gevva un eah soll's an da awldah bringa.

⁹Da preeshtah soll no en dayl aus em shpeis-opfah nemma fa en gedenknis, un soll's fabrenna uf em awldah es en opfah es gmacht is mitt feiyah, fa en goodah kshmakk zumm HAH.

¹⁰Es ivvahrich fumm shpeis-opfah heaht zumm Aaron un sei boova; es is es alli-heilichsht dayl funn di opfahra es gmacht sinn zumm HAH mitt feiyah.

¹¹Es soll kenn shpeis-opfah gmacht sei mitt savvah-dayk es du zumm HAH bringsht, fa du solsht kenn yeast adda hunnich brenna in en opfah es du machsht zumm HAH bei feiyah.

¹²Du solsht si zumm HAH bringa es en eahsht-frucht-opfah, avvah si sella nett gopfaht sei uf em awldah fa en seesah kshmakk.

¹³Alli shpeis-opfah soll ksalsa sei. Loss es sals fumm bund funn deim Gott nett aus dei shpeis-opfah. Du sals in awl dei opfahra.

¹⁴Vann du en shpeis-opfah fumm eahshta frucht zumm HAH bringsht, dann solsht du di kebb fumm neiya frucht mawla un si rohshta im feiyah.

¹⁵Du solsht ayl druff leahra un insens druff du; es is en shpeis-opfah.

¹⁶Da preeshtah soll's gedenknis dayl fumm gmawla frucht un ayl fabrenna mitt em insens. Es is en opfah gmacht zumm HAH mitt feiyah.’”