Read Pennsylvania German 3. Mosi 24 Bible Online

3. Mosi 24 - Pennsylvania German bible

3. Mosi 24

¹Da HAH hott no kshvetzt zumm Mosi un hott ksawt,

²“Gebb en gebott zu di Kinnah-Israel es si pyuah ayl bringa funn ayl-frucht es ausgeprest voah fa's licht. Dess ayl is so es di lichtah di gans zeit am brenna bleiva.

³Autseit em curtain funn di Bundes-Lawt im fasamling-tent soll da Aaron di gans zeit acht gevva uf di lichtah fannich em HAH funn ohvets biss meiyets. Dess is en ayvichi adning fa eiyah nohch-kummashaft.

⁴Eah soll alli dawk acht gevva uf di lichtah uf em licht-shtaend es gmacht is funn pyuah gold.

⁵Nemm fei mayl un bakk zvelf layb broht. Nemm drei gvoaht mayl fa yaydah layb.

⁶Setz si in zvay roiya, sex in yaydah roi, uf da pyuah gold dish es fannich em HAH is.

⁷Nemm pyuah insens un du's in yaydah roi es en gedenknis fa's broht, en opfah zumm HAH gmacht mitt feiyah.

⁸Alli Sabbat-Dawk soll eah's broht fannich da HAH setza fa di Kinnah-Israel es en ayvich bund.

⁹Dess broht heaht zumm Aaron un sei boova, un si sella's essa in en heilichah blatz, veil dess en oahrich heilich dayl is funn di opfahra es gmacht sinn zumm HAH mitt feiyah.”

¹⁰Nau da boo funn en Israeliddishi maemm un en Egyptah daett is naus ganga unnich di Kinnah-Israel, un eah un en Israeliddah henn ohkfanga fechta in di camp.

¹¹Nau deah halb Israeliddah hott da Nohma fumm HAH faleshtaht un faflucht. No henn si een zumm Mosi gebrocht. (Sei maemm iahra nohma voah Selomith, un iahra daett voah da Dibri funn di Daniddah.)

¹²No henn si een eikshtekt biss si em HAH sei villa gvist henn diveyya.

¹³No hott da HAH ksawt zumm Mosi,

¹⁴“Nemm da leshtahrah naus aus di camp. Awl selli es een keaht henn sella iahra hend uf sei kobb layya, no loss di gans fasamling een shtaynicha.

¹⁵Sawk zu di Kinnah-Israel, ‘Ennich ebbah es sei Gott faflucht, muss sei sind drawwa.

¹⁶Un veah-evvah es da Nohma fumm HAH faleshtaht muss doht gmacht sei; di gans fasamling soll een shtaynicha. Ennichah Israeliddah adda en ausahrah es in Israel voond es da nohma fumm HAH faleshtaht muss doht gmacht sei.

¹⁷Un ennich ebbah es en mensh doht macht muss aw doht gmacht sei.

¹⁸Ennich ebbah es ebbah shunsht sei diah doht macht muss goot shtay difoah, en layva fa en layva.

¹⁹Vann en mann sei nochbah vay dutt, dann muss gedu sei zu eem grawt vass eah gedu hott zu sei nochbah:

²⁰en fabrochanah gnocha fa en fabrochanah gnocha, en awk fa en awk, en zoh fa en zoh. Vi eah da annah vay gedu hott, so muss eah vay gedu sei.

²¹Veah-evvah es ebbah sei diah doht macht muss goot shtay difoah, avvah veah-evvah es en mensh doht macht muss aw doht gmacht sei.

²²Diah misset di sayma gebodda havva fa di ausahra unnich eich es fa di Israeliddah. Ich binn da HAH eiyah Gott.’”

²³No hott da Mosi kshvetzt zu di Kinnah-Israel, un si henn da leshtahrah naus aus di camp gnumma un henn een kshtaynicht. Di Kinnah-Israel henn gedu vass da HAH da Mosi gebodda katt hott.