Read Pennsylvania German 3. Mosi 3 Bible Online

3. Mosi 3 - Pennsylvania German bible

3. Mosi 3

¹“‘Vann ebbah en dank-opfah opfahra vill, un eah opfaht fumm fee, eb's en bull adda en koo is, dann soll eah ayns opfahra fannich em HAH es nix letz is mitt.

²Eah soll sei hand uf da kobb funn sei opfah du, un's shlachta an di deah fumm fasamling-tent. No sella em Aaron sei boova di preeshtah es bloot veddah di fiah seida fumm awldah shpritza.

³Fumm dank-opfah soll eah en opfah zumm HAH bringa es gmacht is bei feiyah. Awl's fett um di deahm rumm un es uf di deahm is,

⁴di zvay niahra mitt em fett druff hinna am bauch nohch un's besht dayl fumm fett um di levvah rumm soll eah raus nemma mitt di niahra.

⁵No sella em Aaron sei boova's ufbrenna uf em awldah ovva uf em brand-opfah un em hols es am brenna is. Dess is en opfah gmacht mitt feiya fa en goodah kshmakk zumm HAH.

⁶Vann sei dank-opfah zumm HAH funn di shohf un gays is, soll eah en bokk adda en muddah diah opfahra es nix letz is mitt.

⁷Vann eah en lamm opfaht, soll eah's opfahra fannich em HAH.

⁸Eah soll sei hand uf da kobb fumm opfah layya un soll's shlachta fannich em fasamling-tent. Em Aaron sei boova sella's bloot uf di fiah seida fumm awldah shpritza.

⁹Fumm dank-opfah soll eah dess opfah zumm HAH bringa es gmacht is mitt feiyah: Es fett, da gans fett shvans es abkshnidda is nayksht am rikshtrang, awl's fett um di deahm rumm un uf di deahm,

¹⁰di zvay niahra mitt em fett druff hinna am bauch nohch un um di levvah rumm, soll eah raus nemma mitt di niahra.

¹¹Da preeshtah soll's no fabrenna uf em awldah es ess-sach, en opfah zumm HAH mitt feiyah.

¹²Vann sei opfah en gays is, soll eah een opfahra fannich em HAH.

¹³Eah soll sei hand uf sei kobb layya un en shlachta fannich em fasamling-tent. Em Aaron sei boova sella no's bloot uf di fiah seida fumm awldah shpritza.

¹⁴Funn vass eah opfaht soll eah dess opfah zumm HAH bringa mitt feiyah: Awl's fett um di deahm rumm un es uf di deahm is,

¹⁵di zvay niahra mitt em fett druff hinna am bauch nohch un um di levvah rumm, soll eah raus nemma mitt di niahra.

¹⁶Da preeshtah soll's no fabrenna uf em awldah es en ess-sach-opfah, en opfah es gmacht is mitt feiyah fa en goodah kshmakk. Awl's fett heaht zumm HAH.

¹⁷Dess is en ayvichi adning fa eiyah nohch-kummashaft vo-evvah es diah voonet: Diah sellet kenn fett adda bloot essa.’”