Read Pennsylvania German 3. Mosi 7 Bible Online

3. Mosi 7 - Pennsylvania German bible

3. Mosi 7

¹“‘Nau dess sinn di gebodda fumm shuld-opfah; es is en alli-heilichsht opfah.

²Am blatz vo's brand-opfah kshlachta vatt soll's shuld-opfah kshlachta sei, un's bloot soll uf di fiah seida fumm awldah kshpritzt sei.

³Awl's fett soll gopfaht sei: Da fett shvans un's fett um di deahm rumm,

⁴di zvay niahra un iahra fett hinna am bauch nohch un um di levvah rumm sella aw raus gnumma sei mitt di niahra.

⁵Da preeshtah soll si fabrenna uf em awldah es en opfah zumm HAH bei feiyah. Es is en shuld-opfah.

⁶Ennichi preeshtah mennah daufa dess essa. Es soll gessa sei in en heilichah blatz; es is en alli-heilichsht opfah.

⁷Di sayma gebodda fa di shuld-opfahra sinn aw di gebodda fa di sind-opfahra. Si heahra zumm preeshtah es di opfahra macht.

⁸Da preeshtah es es brand-opfah opfaht fa ennich ebbah dauf di haut halda fa sich selvaht.

⁹Alli shpeis-opfah es gebakka is in en offa, adda gekocht in en griddle adda en pann heaht zu sellem preeshtah es es opfaht.

¹⁰Un alli shpeis-opfah es drukka is, adda es gmixt is mitt ayl, heaht zu awl em Aaron sei boova, un muss gleicha fadayld sei.

¹¹Nau dess sinn di gebodda fa's dank-opfah es gevva sei soll zumm HAH.

¹²Vann eah's uf opfaht veil eah dankboah is, dann soll eah mitt em dank-opfah, en opfah macha funn unksavvahdi kucha es gmixt sinn mitt ayl, adda unksavvahdi kichlen es kshmiaht sinn mitt ayl, adda kucha funn fei mayl mitt ayl goot nei kshaft.

¹³Mitt em dank-opfah fa dankboah sei soll eah en opfah bringa funn kucha es gmacht sinn funn ksavvaht broht.

¹⁴Eah soll en opfah bringa funn yaydah satt un's zumm HAH gevva. Es heaht zumm preeshtah es es dank-opfah bloot shpritzt.

¹⁵Es flaysh fumm dankboah dank-opfah muss gessa sei uf em dawk es es gopfaht vatt; es dauf nix ivvahrich sei difunn biss da neksht meiya.

¹⁶Vann sei dank-opfah gopfaht vatt fa ebbes ausdrawwa es eah kshvoahra hott, adda fa en frei-villich opfah sei, dann soll's gessa sei uf em dawk es es gopfaht vatt, avvah vann ennich ebbes ivvahrich is, dann kann's gessa sei da neksht dawk.

¹⁷Avvah ennich flaysh fumm opfah es ivvahrich bleibt biss da dritt dawk soll fabrend sei mitt feiyah.

¹⁸Ennich flaysh fumm dank-opfah es gessa is da dritt dawk vatt nett ohgnumma. Es vatt nett ohgnumma fa en hilf zumm opfahrah. Es vatt en grausam ding un sellah es est difunn, macht sich shuldich difoah.

¹⁹Flaysh es veddah ennich ebbes kumd es unrein is soll nett gessa sei; es soll fabrend sei mitt feiyah. Annah flaysh kann gessa sei bei ennich ebbah es rein is.

²⁰Avvah vann ebbah unrein is un flaysh est fumm dank-opfah zumm HAH, dann soll eah abkshnidda sei funn sei leit.

²¹Vann ebbah ebbes ohraykt es unrein is, eb's en unreinah mensh is, adda en unrein diah, adda ennich unrein grausam ding, un est no's flaysh fumm dank-opfah zumm HAH, dann soll eah abkshnidda sei funn sei leit.’”

²²Da HAH hott no ksawt zumm Mosi,

²³“Sawk zu di Kinnah-Israel: ‘Diah sellet kenn fett essa funn kee, shohf adda gays.

²⁴Es fett funn en diah es doht kfunna vatt adda farissa vatt bei vildi diahra, kann gyoost vadda fa anri sacha, avvah's dauf nett gessa sei.

²⁵Ennich ebbah es es fett funn en diah est es gopfaht voah bei feiyah zumm HAH, soll abkshnidda sei funn sei leit.

²⁶Vo-evvah es diah voonet, sellet diah kenn bloot essa funn ennichi fekkel adda diahra.

²⁷Ennich ebbah es bloot est, sellah mensh muss abkshnidda sei funn sei leit.’”

²⁸No hott da HAH ksawt zumm Mosi,

²⁹“Sawk zu di Kinnah-Israel: ‘Ennich ebbah es en dank-opfah zumm HAH bringd, soll dayl difunn zumm HAH bringa es sei opfah.

³⁰En opfah bei feiyah zumm HAH soll eah bringa mitt sei aykni hend. Eah soll's fett bringa mitt di brusht un si shvinga fannich em HAH fa en shving-opfah.

³¹Da preeshtah soll's fett fabrenna uf em awldah, avvah di brusht heaht zumm Aaron un sei boova.

³²Diah sellet da rechts shuldah fumm dank-opfah zumm preeshtah gevva fa en kshenk.

³³Sellah fumm Aaron sei boova es es bloot un fett fumm dank-opfah opfaht soll da rechts shuldah havva fa sei dayl.

³⁴Funn di Kinnah-Israel iahra dank-opfahra habb ich di brusht gnumma es kshvunga is un da rechts shuldah es gopfaht is, un habb si zumm preeshtah Aaron un sei boova gevva fa iahra dayl fa'immah.’”

³⁵Dess is es dayl funn di opfahra, gmacht bei feiyah zumm HAH, es gevva voah zumm Aaron un sei boova uf em dawk es si eiksetzt voahra fa preeshtah sei zumm HAH.

³⁶Uf em dawk es si ksalbt voahra, hott da HAH gebodda gevva zu di Kinnah-Israel es si dess dayl gevva zu di preeshtah. Es is iahra dayl un awl iahra nohch-kummashaft iahres.

³⁷Sell sinn di gebodda fumm brand-opfah, fumm shpeis-opfah, fumm sind-opfah, fumm shuld-opfah, fumm eisetz-opfah un fumm dank-opfah.

³⁸Da HAH hott dee gebodda gevva zumm Mosi uf em Berg Sinai, am dawk es eah di Kinnah-Israel gebodda hott fa iahra opfahra zumm HAH gevva in di Vildahnis funn Sinai.