Read Pennsylvania German 3. Mosi 8 Bible Online

3. Mosi 8 - Pennsylvania German bible

3. Mosi 8

¹No hott da HAH zumm Mosi ksawt,

²“Bring da Aaron un sei boova, iahra glaydah, es salb-ayl, da bull fa's sind-opfah, di zvay shohf-bekk un di keahb mitt em unksavvaht-broht,

³un geddah awl di leit zammah am doah fumm fasamling-tent.”

⁴So hott da Mosi gedu vi da HAH een gebodda hott, un di gans fasamling is zammah kumma am doah fumm fasamling-tent.

⁵Da Mosi hott no ksawt zu di fasamling, “Dess is vass da HAH gebodda hott es gedu sei soll.”

⁶No hott da Mosi da Aaron un sei boova gebrocht un hott si gvesha mitt vassah.

⁷Eah hott no em Aaron da linnen rokk ohgedu un hott da shtrikk um sei bauch rumm gebunna. No hott eah eem da preeshtah-rokk ohgedu un aw da preeshtah-shatz. Eah hott da preeshtah-shatz gebunna mitt em shay-kflochta belt.

⁸No hott eah's brusht-shtikk uf sei brusht gedu, un hott da Urim un Thummim in da sakk fumm brusht-shtikk gedu.

⁹Eah hott no's kobb-duch uf sei kobb un fanna uf's kobb-duch hott eah's goldich dellah, da heilich krohn, gedu grawt vi da Mosi gebodda voah beim HAH.

¹⁰Da Mosi hott no salb-ayl gnumma un hott da tempel-tent un alles es drinn voah ksalbt; dess hott alles heilich gmacht.

¹¹Eah hott samm fumm ayl gnumma un hott da awldah sivva mohl kshpritzt mitt. Eah hott da awldah, 's awldah-ksha, di vesh-shissel un iahra shtaend awl ksalbt, un hott si heilich gmacht.

¹²No hott eah samm fumm salb-ayl uf em Aaron sei kobb gleaht un hott een ksalbt fa een heilich macha.

¹³Eah hott no em Aaron sei boova bei gebrocht un hott eena linnen rekk ohgedu, hott di shtrikk um iahra bauch rumm gebunna un hott kobb-dichah um iahra kebb rumm gedu, grawt vi da HAH da Mosi gebodda hott.

¹⁴No hott eah da bull gebrocht fa's sind-opfah. Da Aaron un sei boova henn iahra hend uf em bull sei kobb glaykt.

¹⁵No hott da Mosi da bull kshlachta, un hott samm fumm bloot gnumma un hott's uf di hanna fumm awldah gedu mitt seim fingah fa da awldah rein macha. No hott eah's ivvahrich bloot an da foos fumm awldah gleaht. Sellah vayk hott eah da awldah rein un heilich gmacht.

¹⁶Awl's fett um di deahm un di levvah rumm, un di zvay niahra mitt iahra fett hott eah gnumma un hott's alles fabrend uf em awldah.

¹⁷Avvah da bull mitt sei haut, sei flaysh un misht hott eah fabrend vekk funn di camp, so vi da HAH da Mosi gebodda hott.

¹⁸No hott eah da shohf-bokk gebrocht fa's brand-opfah, un da Aaron un sei boova henn iahra hend uf sei kobb glaykt.

¹⁹Da Mosi hott'n no kshlachta un hott's bloot uf di fiah seida fumm awldah kshpritzt.

²⁰Eah hott da shohf-bokk in shtikkah kshnidda un hott da kobb, di shtikkah flaysh un's fett fabrend.

²¹No hott eah di deahm un di bay gvesha mitt vassah un hott da gans shohf-bokk gopfaht uf em awldah. Dess voah en brand-opfah fa en goodah kshmakk macha, en opfah mitt feiyah zumm HAH, so vi da HAH da Mosi gebodda katt hott.

²²No hott da Mosi da zvett shohf-bokk gebrocht. Deah voah fa di preeshtah eisetza, un da Aaron un sei boova henn iahra hend uf em shohf-bokk sei kobb glaykt.

²³Da Mosi hott da bokk no kshlachta un hott samm fumm bloot uf em Aaron sei rechts oahra-labb, sei rechtsah daumah un sei rechtsah grohsah zeyya gedu.

²⁴Eah hott no em Aaron sei boova bei gebrocht un hott samm fumm bloot uf iahra rechtsi oahra-labba, iahra rechtsi daumah un iahra grohsi, rechtsi zeyya gedu. Es ivvahrich bloot hott da Mosi no uf di fiah seida fumm awldah kshpritzt.

²⁵Eah hott no's fett, da fett shvans, awl's fett um di deahm un di levvah rumm, di zvay niahra un iahra fett un da rechts shuldah gnumma.

²⁶Ovva uf dee hott eah en layb unksavvaht-broht, en kucha gmixt mitt ayl un en dinn kichli glaykt. Dee hott eah awl aus em unksavvaht-broht koahb gnumma es fannich em HAH voah.

²⁷No hott eah awl dess im Aaron un sei boova iahra hend gedu, un hott's kshvunga fa en shving-opfah fannich em HAH.

²⁸No hott da Mosi dess aus iahra hend gnumma un hott's fabrend uf em awldah ovva uf em brand-opfah. Dess voah en eisetz-opfah fa en goodah kshmakk macha, en opfah mitt feiyah zumm HAH.

²⁹Da Mosi hott aw di brusht gnumma un hott si kshvunga fa en shving-opfah fannich em HAH. Dess voah em Mosi sei dayl fumm eisetz-bokk, un voah vi da HAH da Mosi gebodda katt hott.

³⁰No hott da Mosi samm fumm salb-ayl un samm fumm bloot uf em awldah gnumma un hott da Aaron un sei glaydah, un aw sei boova un iahra glaydah kshpritzt mitt. So hott eah da Aaron un sei glaydah, un sei boova un iahra glaydah heilich gmacht.

³¹Da Mosi hott no ksawt zumm Aaron un sei boova, “Kochet's flaysh am doah fumm fasamling-tent. Esset's datt mitt em broht es im eisetz-koahb is, grawt vi da HAH gebodda hott vo eah ksawt hott, ‘Da Aaron un sei boova sella's essa.’

³²Un's ivvahrich fumm flaysh un broht sellet diah fabrenna im feiyah.

³³Fa sivva dawk sellet diah nett naus gay aus di deah fumm fasamling-tent biss di zeit funn eiyah eisetzes ivvah is. Di zeit funn eiyah eisetzes nemd sivva dawk.

³⁴Vass heit gedu voah, voah gebodda beim HAH fa eich heilich macha.

³⁵Diah misset an di deah fumm fasamling-tent bleiva dawk un nacht fa sivva dawk, un du vass da HAH foddaht funn eich. Dess is so es diah nett shteahvet, fa dess is vass da HAH gebodda hott.”

³⁶So hott da Aaron un sei boova alles gedu es da HAH gebodda hott deich da Mosi.