Read Pennsylvania German 3. Mosi 9 Bible Online

3. Mosi 9 - Pennsylvania German bible

3. Mosi 9

¹Nau uf em achta dawk hott da Mosi da Aaron, sei boova un di eldishti funn Israel zammah groofa.

²Eah hott ksawt zumm Aaron, “Nemm en yung hamli fa dei sind-opfah un en shohf-bokk fa dei brand-opfah, awl zvay unni faylah, un bring si fannich da HAH.

³No sawk zu di Kinnah-Israel: ‘Nemmet en gays-bekli fa en sind-opfah; en hamli un en shibli, awl zvay en yoah ald un unni faylah, fa en brand-opfah,

⁴un en ox un en shohf-bokk fa en dank-opfah fa en opfah macha fannich em HAH. Un machet aw en shpeis-opfah gmixt mitt ayl. Fa heit zayld da HAH sich veisa zu eich.’”

⁵Si henn no di sacha gnumma es da Mosi gebodda hott, un henn si an's feddahsht end fumm fasamling-tent gebrocht. No is di gans fasamling nayksht kumma un hott fannich em HAH kshtanna.

⁶Da Mosi hott no ksawt, “Dess is vass da HAH gebodda hott es diah du sellet, so es di hallichkeit fumm HAH sich veist zu eich.”

⁷No hott da Mosi ksawt zumm Aaron, “Kumm nayksht an da awldah un opfah dei sind-opfah un dei brand-opfah so es dei sinda vekk gnumma sinn, un aw di leit iahri; mach en opfah fa di leit so es iahra sinda vekk gnumma sinn, grawt vi da HAH gebodda hott.”

⁸Da Aaron is no nayksht an da awldah ganga un hott's hamli kshlachta fa en sind-opfah fa sich selvaht.

⁹Em Aaron sei boova henn's bloot zu eem gebrocht, un eah hott sei fingah in's bloot gedu un hott's no uf di hanna fumm awldah gedu. 'S ivvahrich fumm bloot hott eah no an da foos fumm awldah gleaht.

¹⁰Es fett, di niahra un di haut um di levvah rumm fumm sind-opfah hott eah fabrend uf em awldah, so vi da HAH da Mosi gebodda hott.

¹¹'S flaysh un di ausahsht haut hott eah fabrend draus vekk funn di camp.

¹²No hott eah's brand-opfah kshlachta. Sei boova henn eem's bloot anna glangd, un eah hott's veddah di fiah seida fumm awldah kshpritzt.

¹³No henn si eem's brand-opfah gevva shtikk bei shtikk, un aw da kobb, un eah hott si fabrend uf em awldah.

¹⁴Eah hott no di deahm un di bay gvesha un hott si fabrend mitt em brand-opfah uf em awldah.

¹⁵Da Aaron hott no's opfah gebrocht es gvest voah fa di leit. Eah hott da gays gnumma fa di leit iahra sind-opfah un hott en kshlachta fa's sind-opfah so vi's eahshta.

¹⁶Eah hott aw's brand-opfah gebrocht un's gopfaht so vi's ausglaykt voah.

¹⁷No hott eah's shpeis-opfah gebrocht, hott en hand-foll gnumma un hott's fabrend uf em awldah. Dess voah nayvich em brand-opfah es sellah meiya gopfaht voah.

¹⁸Eah hott no da ox un da shohf-bokk fumm dank-opfah kshlachta fa di leit. Sei boova henn eem's bloot anna glangd un eah hott's uf di fiah seida fumm awldah kshpritzt.

¹⁹Avvah's fett fumm ox un shohf-bokk—da fett shvans, es fett am bauch nohch, di niahra un di haut ivvah di levvah—

²⁰henn si uf di brisht glaykt, un da Aaron hott's fett fabrend uf em awldah.

²¹Avvah di brisht un da rechts shuldah hott da Aaron kshvunga fa en shving-opfah fannich em HAH, so vi da Mosi gebodda katt hott.

²²No hott da Aaron sei hend ufkohva geyyich di leit un hott si ksaykend. Noch demm es eah faddich voah's sind-opfah, brand-opfah un dank-opfah macha, is eah runnah kumma.

²³Da Mosi un da Aaron sinn no in da fasamling-tent ganga. Vo si raus kumma sinn, henn si di leit ksaykend, un di hallichkeit fumm HAH hott sich gvissa zu awl di leit.

²⁴No is feiyah raus kumma fumm HAH, un hott's brand-opfah un's fett uf em awldah gans fabrend. Vo di leit dess ksenna henn, henn si laut gegrisha un sinn uf iahra ksichtah kfalla.